3 मिनिटे 34 सेकंदाच्या व्हिडिओने दिल्लीच्या राजकारणात मोठी खळबळ, राघव चड्ढा यांचा आक्रमक पलटवार; स्वपक्षीय नेत्यांचे वाभाडे काढले

AAP ने आरोप केला की विरोधक जेव्हा संसदेत वॉकआउट करतात तेव्हा राघव चड्ढा सभागृहातच बसून राहतात आणि त्यांच्यात सामील होत नाहीत. यावर चड्ढा यांनी ठामपणे प्रतिक्रिया देत हा आरोप पूर्णपणे खोटा असल्याचे म्हटले.

दुसरा आरोप असा आहे की, त्यांनी मुख्य निवडणूक आयुक्त ज्ञानेश कुमार यांच्या महाभियोग प्रस्तावावर सही करण्यास नकार दिला. यालाही त्यांनी खोटे ठरवत म्हटले की, पक्षातील कोणत्याही नेत्याने मला हा प्रस्ताव साइन करण्यास सांगितलेच नाही. AAP चे राज्यसभेत 10 खासदार आहेत, त्यापैकी 6-7 जणांनी स्वतःही सही केलेली नाही, मग फक्त माझ्यावरच दोष का?

तिसरा आरोप असा आहे की चड्ढा घाबरले आहेत आणि त्यामुळे ते किरकोळ मुद्दे मांडतात. AAP दिल्लीचे प्रमुख सौरभ भारद्वाज यांनी त्यांच्यावर टीका करत म्हटले की, आम्ही अरविंद केजरीवाल यांचे सैनिक आहोत आणि ‘जो डर गया समझो मर गया’ हेच आम्ही शिकलो आहोत. छोट्या पक्षाला संसदेत मर्यादित वेळ मिळतो. त्यामुळे देशाचे मोठे मुद्दे मांडणे अधिक महत्त्वाचे आहे.

मी संसदेत गोंधळ घालण्यासाठी, आरडाओरडा करण्यासाठी किंवा माईक तोडण्यासाठी जात नाही. मी लोकांचे प्रश्न मांडण्यासाठी आणि त्यांच्या वतीने बोलण्यासाठी संसदेत जातो. GST, आयकर, पंजाबमधील पाणीटंचाई, दिल्लीतील हवेची गुणवत्ता, सरकारी शाळांची स्थिती, सार्वजनिक आरोग्य व्यवस्था, भारतीय रेल्वे प्रवाशांच्या समस्या, तसेच मासिक पाळी आरोग्यासारख्या विषयांवरही चर्चा केली आहे. बेरोजगारीपासून महागाईपर्यंत सर्व महत्त्वाचे मुद्दे संसदेत उपस्थित केल्याचा दावा त्यांनी केला.