Bhiwandi: बॅट चुकून विहिरीत पडली, पाण्यात उतरला पण अंदाज चुकला, तरण्याबांड पोराचा बुडून मृत्यू

मिळालेल्या माहितीनुसार, बिलाल यांच्या घराच्या शेजारी असलेल्या एका जीन्स कंपनीच्या कंपाउंडमध्ये जुनी विहीर आहे. काही दिवसांपूर्वी बिलालची क्रिकेट बॅट चुकून त्या विहिरीत पडली होती. तीच बॅट पाण्यातून बाहेर काढण्यासाठी बिलाल विहिरीत उतरला असताना हा दुर्दैवी अपघात घडला. घटनेची माहिती स्थानिकांनी पोलिसांना देताच घटनास्थळी पोलिस दाखल झाले.

पोलिसांनी मृतदेह बाहेर काढून आयजीएम रुग्णालयात शवविच्छेदनासाठी पाठवला आहे. सध्या भोईवाडा पोलीस ठाण्याचे अधिकारी या प्रकरणाचा तपास करत असून, विहिरीभोवती सुरक्षेची काय व्यवस्था होती आणि हा अपघात नेमक्या कोणत्या परिस्थितीत झाला, याचा शोध घेतला जात आहे. या घटनेनंतर परिसरात तसेच बिलाल अन्सारी यांच्या कुटुंबीयांमध्ये शोककळा पसरली आहे