महाराज वनौषधी शोधायला डोंगरात गेले, पाय घसरला अन्..., छ. संभाजीनगरात हळहळ

गुरुवारी सकाळी सुमारे आठच्या सुमारास महाराज सिल्लोड तालुक्यातील केळगाव येथील श्री क्षेत्र मुर्डेश्वरपासून जवळपास तीन किलोमीटर अंतरावरील मुर्डेश्वर डोंगरावर गेले होते. डोंगराळ भागात काही दुर्मिळ वनौषधी शोधत असताना अचानक पाय घसरला आणि ते थेट सुमारे दोनशे फूट खोल दरीत कोसळले.

महाराजांना बाहेर काढण्यासाठी ग्रामस्थांनी दरीतून सुमारे दोनशे फूट लांबीचा मार्ग तयार केला. हा मार्ग अतिशय धोकादायक आणि खडतर होता. सकाळी 9 वाजता घडलेला अपघात आणि दुपारी 5 वाजता महाराजांना बाहेर काढण्यात आले. तब्बल सात तासांचा हा संघर्ष ग्रामस्थांसाठीही आव्हानात्मक ठरला.

दरीतून अडकलेल्या अवस्थेतही कमलगिरी महाराजांनी पत्नी आणि मुलगा वैभव यांच्याशी मोबाईलद्वारे संपर्क साधला होता. मात्र, डोंगराळ व दुर्गम भागामुळे मुलाला घटनास्थळी पोहोचण्यास दुपारचे 4 वाजले. अखेर महाराजांना बाहेर काढून रुग्णवाहिकेतून सिल्लोड येथील रुग्णालयात नेत असतानाच त्यांची प्राणज्योत मालवली. या दुर्दैवी घटनेमुळे परिसरात हळहळ व्यक्त केली जात आहे. कमलगिरी महाराजांच्या पश्चात पत्नी, दोन मुले, एक मुलगी, सुना आणि नातवंडे असा परिवार आहे.