देवा रे! नैवेद्य समजून बैलाने मंगळसूत्र गिळलं, 2 तासांचं ऑपरेशन, 14 दिवसानंतर नेमक काय घडल?

22 ऑक्टोबर रोजी गोवर्धन पूजनाच्या निमित्ताने शेतकरी केवलसिंह श्रीभान चिल्हारे यांच्या घरी पारंपरिक पद्धतीने बैलांची पूजा सुरू होती. औक्षण करताना सोन्याचे मंगळसूत्र बैलाच्या माथ्याला अर्पण करण्यासाठी घेतले असता, बैलाने ते नैवेद्य समजून गिळून टाकले. कुटुंबाने सुरुवातीला ते शेणातून पडेल अशी आशा धरली, पण दिवसेंदिवस प्रतीक्षा वाढत गेली आणि काळजी वाढत होती. म्हणून अखेर पशुवैद्यकीय तज्ज्ञांचा सल्ला घेण्यात आला.

सेवानिवृत्त सहायक पशुधन विकास अधिकारी डॉ. जी. एल. पाटेवाड यांनी 5 नोव्हेंबर रोजी बैलाची तपासणी करून शस्त्रक्रियेचा निर्णय घेतला. तब्बल दोन तासांच्या नाजूक शस्त्रक्रियेनंतर सोन्याचे मंगळसूत्र सुरक्षितरीत्या बाहेर काढण्यात आले. मंगळसूत्र मिळालेच, पण त्याहून मोठं म्हणजे बैलाचे प्राणही वाचले.

या शस्त्रक्रियेसाठी सुमारे दहा हजार रुपयांचा खर्च आला, मात्र कुटुंबासाठी हा पैसा नव्हे तर भावनिक दिलासा ठरला. “बैल आमचा जिवलग आहे... त्याचे प्राण वाचले हेच खरे धन आहे,” असे चिल्हारे कुटुंबाने समाधान व्यक्त केले. ही घटना केवळ आश्चर्यकारक नाही, तर माणूस आणि जनावरामधील नात्याचं भावनिक दर्शन घडवणारी ठरली आहे.