सुट्टीच्या दिवशी पोहायला गेले पण घात झाला, हर्सूल तलावात बुडून 4 तरुणांचा मृत्यू

मिळालेल्या प्राथमिक माहितीनुसार, आज रविवारची सुट्टी असल्याने काही तरुण मौजमजेसाठी आणि पोहण्यासाठी हर्सूल तलावावर गेले होते. मात्र, पाण्याचा अंदाज न आल्याने हे चौघेही जण खोल पाण्यात बुडाले. स्थानिकांनी आणि बचाव पथकाने तातडीने मदतकार्य सुरू केले, परंतु दुर्दैवाने या तरुणांचे प्राण वाचवता आले नाहीत.

या भीषण दुर्घटनेत मृत्यूमुखी पडलेल्या दोन तरुणांची नावे समोर आली आहेत. अफान खान इरफान खान (वय १७ वर्षे) आणि आदिल मोहसीन शेख (वय १६ वर्षे) यांच्यासह अन्य दोन जणांचाही बुडून मृत्यू झाला आहे.

हे सर्व तरुण अल्पवयीन असल्याने आणि सुट्टीच्या दिवशी ही घटना घडल्याने परिसरात मोठी हळहळ व्यक्त केली जात आहे. पोलिसांनी घटनास्थळाचा पंचनामा केला असून, मृतदेह उत्तरीय तपासणीसाठी पाठवण्यात आले आहेत. हर्सूल तलाव परिसरात पर्यटकांची मोठी गर्दी असते, मात्र सुरक्षेच्या उपाययोजनांचा अभाव असल्याचे स्थानिक सांगतात.