खरातचे Video कुणी दिले? त्याला कसं पकडलं? प्रॉपर्टी कुठे कुठे? फडणवीसांनी कॅप्टनचा कच्चाचिठ्ठा काढला!

मुंबई : चार पीडित महिलांनी भोंदूबाबा अशोक खरात याच्याविरुद्ध विविध पोलीस स्टेशनमध्ये तक्रारी नोंदवल्या आहेत. अशोक खरात याची विशेष पोलीस पथकाकडून चौकशी सुरू आहे. चौकशीत त्याने अनेक महिलांवर शारीरिक अत्याचार केल्याचे प्रथमदर्शनी दिसून येत आहे. महिला भक्तांच्या धार्मिक श्रद्धेशी आणि भावनांशी खेळून त्याने महिलांवर अत्याचार केले. सुरुवातीला त्याच्याविरोधात तक्रार करायला महिला पुढे येत नव्हत्या. मात्र त्यानंतर पोलिसांनी समुपदेशन करून आणि तक्रारदारांना ओळख उघड न होण्याचे आश्वस्त करून तक्रारी देण्यास सांगितले. आतापर्यंत खरातविरोधात सहा तक्रारी आल्या असून पोलीस चौकशी सुरू आहे. त्याने आतापर्यंत अनेक देशांत भ्रंमती केली असून त्याची अहिल्यानगर आणि नाशिक जिल्ह्यांत अनेक ठिकाणी संपत्ती आहे, असे मुख्यमंत्री देवेंद्र फडणवीस यांनी सांगितले. तसेच त्याच्या मालमत्तांची चौकशी सुरू असल्याचे सांगून त्याने करचुकवेगिरी केली आहे का, हे देखील तपासत असल्याचे फडणवीस म्हणाले.