Navratri 2025: नवरात्रीत गरबा खेळण्याची इच्छा आहे? सोप्या टिप्सचा पाहा Video

ध्वनी शाह या गेल्या तीन ते चार वर्षांपासून गरबा शिकवत आहेत. त्या स्वतः गुजराती असल्याने त्यांना गरबा शिकवण्यात विशेष रस आहे. ध्वनी शाह म्हणाल्या, "अनेकांना गरबा खेळायची खूप आवड असते. पण, योग्य पद्धत माहिती नसल्याने त्यांना चांगला गरबा खेळता येत नाही. यासाठीच आम्ही सोसायटीमध्ये गरबा शिकवायला सुरुवात केली. लहान मुलांपासून ते 50 वर्षांपर्यंतच्या महिला आमच्याकडे शिकायला येतात. दोन टाळी, तीन टाळी आणि दांडिया हे त्याचे बेसिक प्रकार आहेत. सोप्या पद्धतीने शिकवलं तर प्रत्येकालाच गरबा खेळता येऊ शकतो."

गरबा शिकताना सुरुवातीला एक गाणं निवडून त्यानुसार एकेक स्टेप्स शिकत गेल्यास पटकन लक्षात राहतं. गरब्यातील प्रत्येक हालचालीला ताल आणि लय आवश्यक असते. एकदा हे जमलं की, नंतर कुठल्याही गाण्यावर सहज नृत्य करता येतं. सोशल मीडियाच्या माध्यमातून गरब्याची क्रेझ वाढली आहे, अशी माहिती सोना जयसिंघानिया यांनी दिली.

नवरात्रौत्सवात गरबा हा फक्त नृत्यप्रकार राहत नाही. आनंद, एकता आणि भक्तीचा उत्सव साजरा करण्याचा तो एक मार्ग मानला जातो. अनेक ठिकाणी सांस्कृतिक कार्यक्रमांमध्येही गरब्याचं आयोजन केलं जातं. काही ठिकाणी गरब्याच्या स्पर्धा देखील होतात. त्यामुळे गरबा फक्त छंदापुरता मर्यादित न राहता तो सण साजरा करण्याचा एक अविभाज्य भाग झाला आहे. सध्या पुण्यासह राज्यभरात गरबा क्लासेसची मागणी वाढली आहे. शरीर तंदुरुस्त ठेवणारा आणि सामाजिक बंध घट्ट करणारा हा नृत्यप्रकार प्रत्येकासाठी आकर्षण ठरत आहे.