महाराष्ट्रात 'धुरंधर 3', चित्रपट पाहून बाहेर येताच खुनी कांड, मध्यरात्री गँगवॉरमधून तिघांची हत्या

शुक्रवारी मध्यरात्री नांदेड शहरातील कॅनाल रोड परिसरातील डीमार्टजवळ दोन गँगमध्ये राडा झाला. यात अर्जित सिंह चव्हाण, मोहम्मद अरबाज आणि सय्यद आवेझ यांचा खून झाला. मोहम्मद अरबाज आणि सय्यद आवेझ यांच्या टोळीने अर्जितला मारण्यासाठी दबा धरला होता. त्यांनी धारदार तलवारीने अर्जितवर वार केले. यात अर्जितचा जागीच मृत्यू झाला. मात्र यावेळी अर्जितबरोबर असलेल्या काही साथीदारांनी प्रतिहल्ला केला. यात अरबाज आणि आवेझचा देखील मृत्यू झाला.

शुक्रवारी मध्यरात्री नांदेडमध्ये साई लाला गँग आणि सदा गँग या दोन गँगमध्ये भीषण टोळीयुद्ध झालं. मयत आणि त्यांचे साथीदार हे सर्व रेकॉर्ड वरील गुन्हेगार असून त्यांच्यावर एमपीडीए अंतर्गत गुन्हेही दाखल आहेत. विशेष म्हणजे मयत अर्जितसिंह चव्हाण हा महापालिका निवडणुकीत प्रभाग क्रमांक 10 मधून उद्धव ठाकरे गटाचा उमेदवार होता. काल रात्री अर्जितसिंह चव्हाण आणि त्याचे दोन साथीदार ई-स्क्वेअर थिएटरमध्ये 'धुरंधर २' चित्रपट पाहायला गेले होते.

चित्रपट पाहून तिघेही बुलेटवर निघाले होते. याचवेळी साई लाला गँगचे सदस्य मोहम्मद अरबाज, सय्यद आवेझ आणि त्यांचे साथीदार दबा धरून होते. चित्रपट पाहून थोड्या अंतरावर अर्जित सिंह आणि त्याचे सहकारी आले असता दबा धरलेल्या गँगने अचानक हल्ला केला. दोन्ही गँगकडून तलवार, चाकू आणि धारदार शस्त्रांचा वापर केला. त्यात सदा गँगचा अर्जितसिंह चव्हाण आणि साई लाला गँगचा मोहम्मद अरबाज यांचा जागीच मृत्यू झाला.

तर आवेझ आणि अन्य जखमींना विष्णुपुरी येथील शासकीय रुग्णालयात हलवण्यात आलं होतं. रुग्णालयात अर्जितसिंह चव्हाण याचा भाऊ आणि वडील आले होते. रुग्णालयात जखमी सय्यद आवेझला दाखल करत असताना अर्जितसिंह चव्हाण याच्या भावाने आवेझवर चाकूने वार केले. यात आवेझचा मृत्यू झाला. या प्रकरणात पोलिसांनी चार जणांना अटक केली आहे. आणखी आरोपींचा शोध सुरू आहे. या प्रकरणात मोठी धरपकड केली जाणार असल्याचे पोलीस अधीक्षक अबिनाश कुमार यांनी सांगितलं. गँगवॉरच्या घटनेमुळे नांदेड शहरात खळबळ उडाली.