Nagar Parishad Election 2025: राणेंच्या होमग्राऊंडमध्ये महायुतीत 'दशा'वतार', शिवसेनेकडूनच ओपन चॅलेंज!

सिंधुदुर्ग जिल्ह्यातील वेंगुर्ले, सावंतवाडी, मालवण या तीन नगरपरिषदा आणि कणकवली नगरपंचायतसाठी २ डिसेंबर २०२५ रोजी निवडणुका होणार आहेत. या निवडणुकांसाठी उमेदवारी अर्ज सादर करण्याचा आजचा अंतिम दिवस होता.  पालकमंत्री नितेश राणे यांचे होमपीच असलेल्या कणकवली नगरपंचायतीसाठी महायुतीमध्ये बिघाडी झाल्याचे दिसून येत आहे. कणकवली शहर विकास आघाडीला शिवसेना शिंदे गटाने पाठिंबा दिल्याने कणकवली नगरपंचायतीची निवडणूक अतिशय चुरशीची होईल. इथं भाजपकडून माजी नगराध्यक्ष समीर नलावडे आणि शहर विकास आघाडीकडून ठाकरे गटाचे जिल्हाप्रमुख संदेश पारकर यांच्यात काटे की टक्कर होईल.

याशिवाय वेंगुर्ले नगरपरिषदेमध्ये सुद्धा महाविकास आघाडी आणि महायुतीमध्ये बिघाडी झाल्याचे दिसून येत आहे. वेंगुर्लामध्ये काँग्रेसचे विलास गावडे यांच्याविरुद्ध भाजपचे दिलीप उर्फ राजन गिरप तर शिंदे शिवसेनेचे नागेश उर्फ पिंट्या गावडे आणि उद्धव बाळासाहेब ठाकरे गटाचे संदेश निकम यांच्या चौरंगी लढत होणार आहे.

एकंदरीत सिंधुदुर्ग जिल्ह्यामध्ये होऊ घातलेल्या नगर परिषद आणि नगरपंचायत निवडणुकांसाठी महायुतीमध्ये बिघाडी झाली असून शिंदे सेना आणि भाजप ही स्वबळावर निवडणुका लढणार आहेत. तर महाविकास आघाडीमध्ये सुद्धा काँग्रेसने स्वबळावर लढण्याचा निर्णय घेतल्यामुळे महाविकास आघाडीतही बिघाडी झाल्याचे दिसून येत आहे.