ज्याला जीव लावला त्यानेच पोत्यात भरलं अन्....नाशिकच्या नर्सची मर्डर मिस्ट्री उलगडली

निफाड तालुक्यातील देवपूर परिसरातून 15 दिवसांपूर्वी बेपत्ता झालेल्या रंभाबाई काळे या महिलेची हत्या झाल्याचे धक्कादायक वास्तव समोर आले आहे. एका खाजगी रुग्णालयात परिचारिका म्हणून सेवा बजावणाऱ्या रंभाबाई यांचा त्यांच्याच प्रियकराने गळा आवळून खून केला आणि पुरावा नष्ट करण्यासाठी मृतदेह विहिरीत फेकून दिला. याप्रकरणी निफाड पोलिसांनी वेगाने तपास चक्रे फिरवून आरोपी अरुण ढेपले याला अटक केली असून त्याने गुन्ह्याची कबुली दिली आहे.

रंभाबाई काळे या गेल्या 15 दिवसांपासून अचानक घरातून बेपत्ता झाल्या होत्या. नातेवाईकांनी सर्वत्र शोध घेऊनही त्या न सापडल्याने अखेर पोलिसांत तक्रार दाखल करण्यात आली होती. पोलिसांनी तांत्रिक तपासाच्या आधारे रंभाबाई यांच्या संपर्कातील व्यक्तींची माहिती घेतली असता अरुण ढेपले याच्यावर संशय बळावला. पोलिसांनी त्याला ताब्यात घेऊन खाक्या दाखवताच त्याने रंभाबाई यांची हत्या केल्याची कबुली दिली.

मिळालेल्या माहितीनुसार, रंभाबाई आणि अरुण यांच्यात प्रेमसंबंध होते. मात्र, काही कारणास्तव त्यांच्यात वाद झाला आणि त्यातूनच अरुणने रंभाबाई यांचा गळा आवळून जीव घेतला. हत्या केल्यानंतर पकडले जाऊ या भीतीने त्याने मृतदेह एका पोत्यात भरला. मृतदेह पाण्यावर तरंगू नये म्हणून त्या पोत्यात जड दगड भरले आणि ते देवपूर परिसरातील एका निर्जन विहिरीत फेकून दिले. 15 दिवसांनंतर हा मृतदेह कुजलेल्या अवस्थेत बाहेर काढण्यात आला आहे.

निफाड पोलिसांनी आरोपी अरुण ढेपले याच्याविरुद्ध भारतीय न्याय संहितेच्या विविध कलमान्वये खुनाचा गुन्हा दाखल केला आहे. या घटनेमुळे आरोग्य क्षेत्रात काम करणाऱ्या महिलांच्या सुरक्षिततेचा प्रश्न पुन्हा एकदा चर्चेत आला असून  देवपूर परिसरात शोककळा पसरली आहे.  या प्रकरणाने संपूर्ण परिसरात खळबळ उडाली असून भीतीचे वातावरण आहे.