घरापासून हाकेच्या अंतरावर असताना काळाचा घाला, बाजार करून येणाऱ्या पती-पत्नीचा मृत्यू

रविवार म्हणजे आठवडा बाजाराचा दिवस, घरातलं संपलेलं साहित्य भरण्यासाठी पती-पत्नी दोघंही निघाले, आठवड्याचा बाजार केला आणि त्यानंतर पुन्हा घरी जायचा निघाले. दोघंही मार्केट करून झाल्यानंतर गप्पा मारत घरी निघालेलं असताना काळानं घात केला. 60 वर्षीय रामचंद्र बनसोडे पत्नी लक्ष्मीसोबत सांगोल्याचा आठवड्याचा बाजार आटोपून दुचाकीवरून बामणी इथे आपल्या घराकडे निघाले होते. पिशवीत आठवड्याभराचा किराणा, भाजीपाला आणि मनात घराकडे जाण्याची ओढ होती. पण त्यांना काय ठाऊक, की घरापासून अवघ्या काही अंतरावर मृत्यू त्यांचा थरकाप उडवण्यासाठी दबा धरून बसला आहे.