साताऱ्यातील प्रसिद्ध शाळेत 24 मुलांचा लैंगिक आणि मानसिक छळ

सुरुवातीला तीन मुलांवर अत्याचाराचा प्रयत्न झाल्याची नोंद झाल्यानंतर तपासामध्ये 24 मुलांवर लैंगिक आणि मानसिक छळ झाल्याचे पोलीस अधीक्षक तुषार दोशी यांनी सांगितले आहे. या प्रकरणाचा अधिक तपास पोलीस करीत असल्याचे पोलीस अधीक्षक तुषार दोशी म्हणाले.

या प्रकरणातील आरोपी ऋषिकेश सुभाष चव्हाण याला अटक करण्यात आले होते. पोलिसांनी त्याला न्यायालयासमोर हजर केले असता न्यायालयाने त्याची जामिनावर मुक्तता केली असल्याची माहिती पोलीस अधीक्षक तुषार दोशी यांनी दिली आहे.

याप्रकरणात ७ तारखेला सातारा पोलिसांनी गुन्हा दाखल केला आहे. एका नामांकित शाळेतील केअर टेकर मुलांचा लैंगिक छळ करीत होता. काही बालकांनी तक्रार केल्यानंतर त्याच्याविरुद्ध तक्रार केली होती. तो मुलांना बॅडटच करीत होता, तसेच त्यांना मारहाण करणे, पैसे मागणे अशा तक्रारी आमच्याकडे आलेल्या होत्या. आधी आमच्याकडे ३ तक्रारी आल्या होत्या, आता आमच्याकडे एकूण २४ तक्रारी आलेल्या आहेत. पोक्सो अंतर्गत गुन्हा दाखल करण्यात आलेला आहे. भारतीय न्याय संहिता ११५/२, ३५१/२ तसेच पोक्सो कायद्याअंतर्गत आम्ही गुन्हा दाखल करून चौकशी करीत आहोत, असे पोलीस अधीक्षक तुषार दोशी यांनी सांगितले. लैंगिक अत्याचाराचा गुन्हा नसून लैंगिक छळाचा आरोप असल्याने न्यायालयाने त्याला जामीन दिल्याचे अधीक्षक दोषी यांनी सांगितले.