Shirdi: तहान भागवताना विजेचा करंट ठरला जीवघेणा, पाणी भरताना महिलेचा शॉक लागून कोळसा

लक्ष्मीनगर परिसरात राहणाऱ्या ज्योती प्रकाश त्रिभुवन (वय ५०) या महिलेचा इलेक्ट्रिक मोटारचा करंट लागून दुर्दैवी मृत्यू झाला. या घटनेमुळे संपूर्ण परिसरात हळहळ व्यक्त होत असून त्रिभुवन कुटुंबावर दुःखाचा डोंगर कोसळला आहे. नेहमीप्रमाणे दुपारच्या वेळी घरात पाणी आलं. घरातील इतर कामं उरकून ज्योतीताई पाणी भरण्यासाठी गेल्या. पाण्यासाठी इलेक्ट्रिक मोटार सुरू करत असतानाच, अचानक विजेचा जोरदार प्रवाह त्यांच्या शरीरातून गेला.

विजेचा धक्का इतका भीषण होता की, त्यांना सावरण्याची संधीही मिळाली नाही. ज्योतीताई जागीच कोसळल्याचे पाहून शेजारील नागरिकांनी मदतीसाठी धाव घेतली. त्यांना तातडीने जवळच्या रुग्णालयात दाखल करण्यात आले, मात्र दवाखान्यात उपचारासाठी नेण्याआधीच त्यांचा दुर्दैवी मृत्यू झाला.

ज्या हातांनी आयुष्यभर संसाराचा गाडा ओढला, मुलाबाळांची तहान भागवली, त्याच हातांना आज विजेचा विळखा बसला. "पाणी भरून येते" असे म्हणून गेलेली ही माऊली आता कधीच परतणार नाही, या विचाराने कुटुंबीयांचा आक्रोश हृदय पिळवटून टाकणारा आहे. एका सामान्य घरगुती कामात अशा प्रकारे प्राणांतिक संकट ओढवेल, अशी कल्पनाही कुणी केली नव्हती.

या घटनेने घरगुती विद्युत उपकरणे वापरताना किती खबरदारी घेणे आवश्यक आहे, हा प्रश्न पुन्हा एकदा ऐरणीवर आला आहे. ज्योतीताईंच्या जाण्याने लक्ष्मीनगर परिसरातील एका हसत्या-खेळत्या कुटुंबाचा आधार कायमचा हरपला.