रेशनकार्ड धारकांसाठी महत्वाची अपडेट! तांदळाऐवजी गव्हासोबत मिळणार हे धान्य

जिल्हा मार्केटिंग फेडरेशनच्या माध्यमातून अहिल्यानगर जिल्ह्यात आठ खरेदी केंद्रांवर मका खरेदी सुरू आहे. आतापर्यंत सुमारे १५ हजार क्विंटल मका खरेदी करण्यात आली असून ही खरेदी २८ फेब्रुवारीपर्यंत सुरू राहणार आहे. खरेदी केलेली संपूर्ण मका रेशन दुकानांमार्फत लाभार्थ्यांना वितरित केली जाणार असल्याने पुढील तीन महिने गव्हासोबत मका मिळण्याची शक्यता आहे.

अंत्योदय योजनेतील कुटुंबांना दरमहा १० किलो मका आणि ११ किलो गहू दिला जाणार आहे. तर प्राधान्य कुटुंब योजनेतील लाभार्थ्यांना प्रत्येकी २ किलो गहू आणि १ किलो मका मिळणार आहे.

रेशन दुकानांमधून नियमितपणे गहू आणि तांदूळ दिले जातात. काही वेळा ज्वारी, साखर, तेल किंवा डाळींचेही वाटप करण्यात आले आहे. यापूर्वी ‘आनंदाचा शिधा’ तसेच साड्यांचेही वितरण झाले होते. मात्र गव्हासोबत मका देण्याचा निर्णय प्रथमच मोठ्या प्रमाणावर घेतला गेला आहे.

जिल्ह्यात नगर, घारगाव, श्रीगोंदा, घोगरगाव, मिरजगाव, शेवगाव, पाथर्डी आणि कोपरगाव येथील फेडरेशन केंद्रांवर मका खरेदी सुरू आहे. मात्र जामखेड आणि संगमनेर येथील केंद्रांवर शेतकऱ्यांची नोंदणी झालेली नसल्याची माहिती समोर आली आहे.