30000000 रुपये! मुंबईत सर्वात मोठा स्टडी अब्रॉड घोटाळा,पोलिसही झाले थक्क

मुंबई :   मुंबईत परदेशात उच्च शिक्षणाच्या नावाखाली विद्यार्थ्यांची आणि पालकांची कोट्यवधी रुपयांची फसवणूक झाल्याचं मोठं प्रकरण उघडकीस आलं आहे. चारकोप परिसरातील करिअर अँड ऑप्शन्स सर्व्हिस लिमिटेड या एजन्सीविरोधात चारकोप पोलीस ठाण्यात गुन्हा दाखल करण्यात आला आहे.  एजन्सीचे मालक स्टेला मेहता आणि राकेश मेहता हे मुख्य आरोपी आहेत.

डिसेंबर महिन्यात प्रथम हा प्रकार समोर आला तेव्हा 13 तक्रारदार पुढे आले होते. मात्र तपास जसजसा पुढे सरकत गेला तसतसे नवीन पीडित समोर येऊ लागले आणि आता तक्रारदारांची संख्या 18 वर पोहोचली आहे. सुरुवातीला सुमारे दोन कोटी रुपयांची फसवणूक झाल्याचा अंदाज होता, परंतु नव्या तक्रारींमुळे हा आकडा तब्बल 2 कोटी 87 लाख 54 हजार 253 रुपये इतका वाढला आहे.

पोलिसांच्या माहितीनुसार, आरोपी दाम्पत्य विद्यार्थ्यांना परदेशात शिक्षणासाठी प्रवेश, व्हिसा प्रक्रिया, विद्यापीठात सीट कन्फर्मेशन आणि निवासाची सोय करून देण्याचं आमिष दाखवत मोठ्या रकमा घेत होते. मात्र पैसे घेतल्यानंतर ना प्रवेश मिळाला ना व्हिसा प्रक्रिया पूर्ण झाली. काहींना बनावट कागदपत्रे देण्यात आल्याचाही संशय व्यक्त केला जात आहे. या प्रकरणाचा फटका केवळ मुंबईपुरता मर्यादित नसून नाशिकमधील एका विद्यार्थ्यालाही या एजन्सीने गंडा घातल्याचं तपासात उघड झालं आहे.

या प्रकरणात आणखी एक धक्कादायक बाब समोर आली आहे. निधी दवे नावाच्या विद्यार्थिनीबाबतही असाच प्रकार घडला असून, या फसवणुकीच्या मानसिक तणावामुळे तिच्या वडिलांचे निधन झाल्याची माहिती तक्रारदारांकडून देण्यात आली आहे.

प्रकरणाचा एकत्रित विचार केला असता, परदेशी शिक्षणाच्या नावाखाली जवळपास 3 कोटी रुपयांची फसवणूक झाल्याचं स्पष्ट होत आहे. दरम्यान गुन्हा दाखल होताच स्टेला मेहता आणि राकेश मेहता फरार झाले असून त्यांनी ओडिशाला पळ काढल्याची प्राथमिक माहिती पोलिसांना मिळाली आहे. आरोपींचा शोध घेण्यासाठी पथके रवाना करण्यात आली असून आर्थिक व्यवहारांची साखळी, बँक खात्यांची माहिती आणि परदेशी विद्यापीठांशी असलेला संपर्क याचा तपास सुरू आहे.

तक्रारदार 1 – ₹10,00,000

तक्रारदार 2 – ₹11,00,000

तक्रारदार 3 – ₹17,50,000

तक्रारदार 4 – ₹14,82,000

तक्रारदार 5 – ₹20,94,000

तक्रारदार 6 – ₹4,60,000

तक्रारदार 7 – ₹9,00,000

तक्रारदार 8 – ₹16,91,000

तक्रारदार 9 – ₹2,75,000

तक्रारदार 10 – ₹13,00,000

तक्रारदार 11 – ₹3,20,000

तक्रारदार 12 – ₹18,85,492

तक्रारदार 13 – ₹22,00,000

तक्रारदार 14 – ₹3,85,000

तक्रारदार 15 – ₹38,67,996

तक्रारदार 16 – ₹39,97,918

तक्रारदार 17 – ₹18,24,693

तक्रारदार 18 – ₹22,21,154

तक्रारदारांनी मोठ्या आशेने मुलांच्या शिक्षणासाठी जमा केलेली बचत या फसवणुकीत गमावल्याने संताप व्यक्त केला जात असून, पोलिसांकडून लवकरात लवकर आरोपींना अटक करण्याची मागणी होत आहे.