महाराष्ट्रात याठिकाणी होणार पुन्हा जोरदार पाऊस, कोणत्या जिल्ह्यात कशी परिस्थिती, सर्व माहिती एका क्लिकवर..

जालना : जून महिन्यामध्ये राज्यातील मराठवाडा वगळता इतर विभागांमध्ये सरासरीपेक्षा कमी पाऊस झाल्याची नोंद करण्यात आली होती. त्यानंतर जुलै महिन्यामध्ये मात्र कोकण, मध्य महाराष्ट्र आणि विदर्भातील तुटीची कसर भरून निघत असून या तिन्ही विभागात जुलै महिन्यात दमदार पाऊस झाल्याचे पाहायला मिळते.

मराठवाड्यातील बहुतांश जिल्ह्यांमध्ये जुलै महिन्यात समाधानकारक पाऊस झालेला नाही. त्यामुळे शेतकरी दमदार पावसाची प्रतीक्षा करत आहेत. राज्याची पश्चिम किनारपट्टी आणि पूर्व विदर्भातील जिल्ह्यांमध्ये पुढील 3-4 दिवस मुसळधार पावसाचा इशारा हवामान विभागाकडून देण्यात आला आहे. त्यामुळे उद्या 19 जुलै रोजी विभागवार राज्यातील हवामानाची स्थिती कशी राहील, हे जाणून घेऊयात.

पुढील 24 तासांत मुंबईत बहुतेक ठिकाणी हवामान विभागाने जोरदार पावसाचा इशारा दिला आहे. तर तुरळ ठिकाणी मुसळधार ते अति मुसळधार पाऊस होण्याची शक्यता वर्तवण्यात आली आहे. तर कोकणातील रायगड, रत्नागिरी, सिंधुदुर्ग, मुंबई, ठाणे, पालघर या सर्व जिल्ह्यांत पुढील 3 ते 4 दिवस मुसळधार पावसाचा इशारा हवामान विभागाने दिला आहे. रायगड रत्नागिरी आणि सिंधुदुर्ग या तीन जिल्ह्यांना पावसाचा रेड अलर्ट दिला आहे. त्यामुळे या भागामध्ये पावसामुळे जनजीवन विस्कळीत होऊ शकतं. तर मुंबई, पालघर, ठाणे या जिल्ह्यांना ऑरेंज अलर्ट देण्यात आला आहे.

मराठवाड्यातील पूर्वेकडील जिल्ह्यांना येलो अलर्ट देण्यात आला आहे. यामध्ये नांदेड, परभणी, हिंगोली या जिल्ह्यांचा समावेश आहे. तर 19 जुलै रोजी छत्रपती संभाजीनगर, जालना या जिल्ह्यांनाही येलो अलर्ट देण्यात आला आहे. उर्वरित जिल्ह्यांमध्ये मात्र पावसाची शक्यता कमीच असल्याचे हवामान विभागाने सांगितले आहे.