T20 World Cup च्या पहिल्याच मॅचपूर्वी टीम इंडियाला मोठा धक्का! 12 तासाआधी ड्रेसिंग रुममधून आली वाईट बातमी

भारतीय क्रिकेट टीमचा मुख्य वेगवान बॉलर जसप्रीत बुमराह आजारी असल्याने अमेरिकेविरुद्धच्या टी-20 वर्ल्ड कप मॅचमध्ये खेळू शकणार नाही. जसप्रीत बुमराहला फणफणून ताप आला होता. भारत आणि अमेरिका यांच्यातील ही महत्त्वाची लढत शनिवारी मुंबईच्या वानखेडे स्टेडियमवर होणार आहे. बुमराहच्या अनुपस्थितीमुळे भारतीय टीमच्या बॉलिंग आक्रमणात मोठा बदल पाहायला मिळणार असून चाहत्यांसाठी हा मोठा धक्का मानला जातोय. त्याच्या जागी मोहम्मद सिराज याला संधी मिळू शकते.

'इंडियन एक्सप्रेस'ने दिलेल्या रिपोर्टनुसार, टीम मॅनेजमेंट बुमराहच्या बाबतीत कोणतीही घाई करण्यास तयार नाही. त्याला पूर्णपणे फिट होण्यासाठी पुरेसा आराम देण्याचा निर्णय घेण्यात आला आहे. बुमराह उपलब्ध नसल्याने भारताला आता उपलब्ध असलेल्या 13 खेळाडूंतूनच आपली प्लेइंग इलेव्हन निवडावी लागणार आहे. वर्ल्ड कपच्या सुरुवातीलाच मुख्य खेळाडू बाहेर जाणे चिंतेची बाब आहे.

दरम्यान, हर्षित राणाला दक्षिण आफ्रिकेविरुद्धच्या सराव सामन्यात दुखापत झाली होती, ज्यानंतर मेडिकल टीमने त्याला अनफिट घोषित केले. बीसीसीआयने प्रसिद्ध केलेल्या पत्रकात म्हटले आहे की, स्कॅन रिपोर्टनुसार राणा या टूर्नामेंटमध्ये खेळू शकणार नाही. त्याच्या जागी आता मोहम्मद सिराज भारतीय पेस अटॅकची धुरा सांभाळताना दिसेल. यामुळे बॉलिंग लाईनअपमध्ये मोठे फेरबदल करण्यात आले आहेत.