Washing Tips : काळे कपडे मशीनमध्ये धुतल्यानंतर दिसतात पांढरे? डोन्ट वरी, घरगुती उपयांमध्येच आहे सोल्युशन

काळ्या रंगाचे कपडे मशीनमध्ये धुतल्यानंतर त्यावर पांढऱ्या रंगाचे डाग, डिटर्जंटचे अवशेष किंवा लिंट चिकटलेले दिसतात, यामुळे त्यांचा मूळ रंग फिका पडतो आणि ते जुने वाटू लागतात. खासकरून डार्क रंगाच्या कपड्यांची काळजी घेणे थोडे कठीण जाते. पण काही साध्या घरगुती उपायांनी तुम्ही तुमच्या आवडत्या काळ्या कपड्यांचा रंग गडद आणि आकर्षक ठेवू शकता.

कपडे उलटे करून धुवा: काळे कपडे मशीनमध्ये टाकण्यापूर्वी नेहमी उलटे करा. यामुळे कपड्यांच्या बाहेरील भागावर घासले जाण्याचे प्रमाण कमी होते, ज्यामुळे लिंट आणि रंग फिका पडणे टळते.

गरम पाण्याचा वापर टाळा: काळे कपडे नेहमी थंड पाण्यात धुवा. गरम पाण्यामुळे कपड्यांचा रंग लवकर उतरतो आणि डिटर्जंटचे डाग जास्त स्पष्ट दिसू शकतात. कमी तापमान रंग टिकवून ठेवण्यास मदत करते.

लिक्विड डिटर्जंट वापरा: पावडर डिटर्जंटऐवजी लिक्विड डिटर्जंटचा वापर करा. पावडर डिटर्जंट पाण्यात पूर्णपणे विरघळत नाही आणि त्याचे पांढरे कण कपड्यांवर चिकटून राहतात, जे डागांसारखे दिसतात.

पांढऱ्या कपड्यांपासून वेगळे करा: काळ्या रंगाचे कपडे पांढऱ्या किंवा इतर हलक्या रंगांच्या कपड्यांपासून पूर्णपणे वेगळे धुवा. यामुळे पांढऱ्या कपड्यांचे लिंट काळ्या कपड्यांना चिकटणार नाहीत.

व्हिनेगरचा वापर: कपडे धुवून झाल्यावर, शेवटच्या पाण्याच्या सायकलमध्ये एक चमचा पांढरे व्हिनेगर टाका. व्हिनेगर डिटर्जंटचे अवशेष काढण्यास आणि कपड्यांचा रंग चमकदार ठेवण्यास मदत करते.

ॲल्युमिनियम फॉइलचा गोळा: कपडे धुताना मशीनमध्ये डिटर्जंटसोबत ॲल्युमिनियम फॉइलचे दोन-तीन छोटे गोळे टाका. हे लिंट आणि इतर तंतू स्वतःकडे आकर्षित करतात, ज्यामुळे ते कपड्यांना चिकटत नाहीत.