Watermelon : पट्टेरी की गडद हिरवं... नक्की कोणतं निवडावं? दोघांपैकी कोणता आहे खरा कलिंगड

उन्हाळ्याच्या सुट्ट्या सुरू झाल्या की बाजारपेठेत दोन प्रकारचे 'हिरवे गोळे' सर्वत्र दिसू लागतात. एक असतो गडद काळ्या-हिरव्या रंगाचा आणि दुसरा असतो ज्यावर फिक्कट हिरव्या पट्ट्या असतात. अनेकदा आपण गोंधळतो की यापैकी खरा कलिंगड कोणता आणि नक्की गोड तसेच चवीला कोणता असेल? या दोन्ही प्रकारांना मराठीत काय म्हणतात आणि आरोग्यासाठी कोणता जास्त चांगला, हे आज आपण सोप्या भाषेत समजून घेऊया.

सर्वात आधी या दोघांच्या नावांबद्दल जाणून घेऊया. ज्या कलिंगडावर हिरव्या पट्ट्या असतात, त्याला ग्रामीण भागात किंवा शेतकरी भाषेत अनेकदा 'पट्टेरी कलिंगड' किंवा 'डिस्को कलिंगड' असं म्हटलं जातं. याचं शास्त्रीय किंवा व्यापारी नाव 'क्रिमसन टाइड' (Crimson Tide) असं आहे. याउलट, जे कलिंगड पूर्णपणे गडद हिरव्या किंवा काळपट रंगाचं असतं, त्याला 'शुगर क्वीन' (Sugar Queen) किंवा 'काळं कलिंगड' असं म्हणतात. जरी ही दोन्ही फळं एकाच कुटुंबातील असली, तरी त्यांच्या गुणधर्मांत थोडे बदल असतात.

पट्टेरी कलिंगडाबद्दल बोलायचं झालं, तर याचं कवच किंवा साल थोडी जाड असते. यामुळे हे कलिंगड लांबच्या प्रवासात किंवा वाहतुकीत लवकर फुटत नाही. याच्या आतला गर गुलाबी-लाल रंगाचा असतो आणि तो खायला थोडा कुरकुरीत (Crunchy) लागतो. ज्यांना खूप जास्त गोड नको पण रसाळ फळ हवं असतं, त्यांच्यासाठी हे पट्टेरी कलिंगड उत्तम पर्याय ठरतं.

दुसरीकडे, पूर्णपणे गडद हिरव्या रंगाचं जे कलिंगड असतं, ते त्याच्या नावाप्रमाणेच 'शुगर क्वीन' असतं. याचं सर्वात मोठं वैशिष्ट्य म्हणजे याची प्रचंड गोडी. याचं कवच पट्टेरी कलिंगडाच्या तुलनेत पातळ असतं आणि आतला गर गडद लाल भडक असतो. हे कलिंगड खायला अत्यंत मऊ आणि गोड असतं. जर तुम्हाला साखर न घालता नॅचरल स्वीटनेस हवा असेल, तर गडद हिरव्या रंगाचं कलिंगड निवडणं केव्हाही चांगलं.

आरोग्याच्या दृष्टीने पाहिलं तर दोन्ही कलिंगडं फायदेशीरच आहेत. कलिंगडामध्ये 'लायकोपीन' नावाचं अँटीऑक्सिडंट असतं, जे आपल्या हृदयाच्या आरोग्यासाठी आणि त्वचेसाठी खूप चांगलं असतं. गडद लाल रंगाच्या कलिंगडात हे लायकोपीन थोड्या जास्त प्रमाणात असतं. तसेच, यात 92 टक्के पाणी असल्यामुळे उन्हाळ्यात शरीरातील पाण्याचे प्रमाण टिकवून ठेवण्यासाठी आणि उष्णतेचा त्रास कमी करण्यासाठी दोन्ही प्रकारची फळं रामबाण उपाय आहेत.