फ्रिज ठेवलेले अन्नपदार्थ खाताय? मग लक्षात ठेवा 'या' गोष्टी, नाहीतर आरोग्याचं होईल मोठं नुकसान!

भाज्या, फळे, दूध, दुग्धजन्य पदार्थ आणि इतर खाद्यपदार्थ खराब होऊ नयेत म्हणून फ्रिजचा वापर केला जातो. अनेक घरांमध्ये तर माणसे सोडल्यास, खाद्यपदार्थांपासून नेलपॉलिशपर्यंत सर्वकाही फ्रिजमध्ये ठेवलं जातं.

फ्रिजमधील हे उपकरण अन्न वाया जाण्यापासून रोखू शकतं आणि शिळ्या अन्नामध्ये जिवाणूंच्या वाढीमुळे आपल्याला होणाऱ्या आजारांपासून वाचवू शकतं.

मात्र, फ्रिजमध्ये ठेवलेले पदार्थ आपल्यासाठी आरोग्यदायी आहेत की नाहीत, याबद्दल अनेकांचे वेगवेगळे मत आहे. आयुर्वेदानुसार, अन्न तयार केल्याच्या काही तासांतच खाण्याची शिफारस केली जाते. पण, आपल्या बदलत्या जीवनशैलीमुळे आपण तसं खाऊ शकत नाही आणि म्हणून आपण ते फ्रिजमध्ये ठेवून खात आलो आहोत.

साधारणपणे, फ्रिजमध्ये ठेवलेल्या अन्नाच्या चवीत कोणताही बदल होत नाही. थंडपणामुळे मांसाहाराच्या चवीवर किंवा पोतावर कोणताही परिणाम होत नाही. मात्र, भाज्यांवर कधीकधी किमान परिणाम होतो आणि फळांवर जास्त परिणाम होतो.

फ्रिजमध्ये जिवाणूंची क्रिया मंदावते, याचा अर्थ अन्न खराब व्हायला जास्त वेळ लागतो. तज्ज्ञांचं म्हणणं आहे की, गोठवलेल्या अन्नात जिवाणू वाढत नाहीत. तुम्ही कोणतीही वस्तू फ्रिजमध्ये ठेवण्यापूर्वी, ती वस्तू खराब झाली नाही ना... याची याची खात्री करून घ्या.

स्वच्छ असल्याची खात्री झाल्यावरच फ्रिजमध्ये ठेवा. भाज्या फ्रिजमध्ये ठेवण्यापूर्वी त्या धुवा. न धुतलेल्या वस्तूंमधील जंतू फ्रिजमधील इतर पदार्थांमध्ये पसरण्याची शक्यता जास्त असते. सुरक्षित अन्न सवयींचा अवलंब करा, जसे की अन्न स्पर्श करण्यापूर्वी हात धुणे आणि अन्न साठवण्यासाठी स्वच्छ भांडी वापरणे.

फ्रिजमध्ये ठेवलेल्या अन्नात जिवाणूंची वाढ थांबत असली तरी, अन्नातील एन्झायमेटिक बिघाड सुरूच राहतो. अन्नातील काही जीवनसत्त्वे देखील कमी होऊ शकतात.