नाश्त्याला विदर्भात घराघरात तयार केली जाते ‘ही’ प्रसिद्ध रेसिपी; बनवण्याची पद्धत पाहा

उकडपेंडी ही विदर्भातील एक प्रसिद्ध रेसिपी आहे. घरोघरी अनेकदा नाश्त्या करिता उकडपेंडी बनवली जाते. वेगवेगळे कडधान्याचे पीठ एकत्र करून किंवा फक्त कणिक आणि रव्याला भाजून देखील ही चविष्ट अशी रेसिपी बनते. ही उकडपेंडीची विदर्भ स्टाईल रेसिपी कशी बनवायची याचीच माहिती अमरावती येथील गृहणी जयश्री पवार यांनी दिली आहे.

उकडपेंडीसाठी लागणारे साहित्य : लालसर एकत्र भाजून घेतलेली रवा आणि कणिक, चिरलेला कांदा, चिरलेला टोमॅटो, चिरलेली मिरची, कोथिंबीर, हळद, तिखट, मीठ, धणेपूड, तेल हे साहित्य लागेल.

उकडपेंडीसाठी कृती : सर्वप्रथम रवा आणि गव्हाची कणिक भाजून घ्यायची आहे. (ही भाजणी तुम्ही नेहमीकरिता स्टोअर करून ठेवून वापरू शकता. आणि यात वेगवेगळ्या कडधान्यचे पीठही अ‍ॅड करू शकता) कढईत तेल गरम करून त्यात जिरे, मोहरी, कांदा आणि मिरची अ‍ॅड करून घ्या.

कांद्याला लालसर रंग येतपर्यंत शिजवून घ्या. त्यात टोमॅटो आणि कढीपत्ता अ‍ॅड करून चांगलं शिजू द्या. टोमॅटोसह त्यात दही देखील अ‍ॅड करता येईल. त्यानंतर आपण घेतलेले सर्व मसाले, तिखट, हळद, मीठ, धणेपूड, एकत्र करून परतून घ्या.

त्यात आता भाजलेला रवा आणि कणिक अ‍ॅड करा. चांगलं परतून घ्या, 2 मिनिट एकत्र करून घ्या. आता त्यात पाणी घालून 2-3 मिनिटे शिजू द्या. आता विदर्भ प्रसिद्ध उकडपेंडी खाण्यासाठी तयार आहे.

तर अशाप्रकारे अगदी 10 मिनिटांत बनवून तयार होणारी विदर्भात आवडीने खाल्ली जाणारी उकडपेंडी कोणी सहज बनवू शकेल. रवा, कणिक, टोमॅटो, मिरची, कांदा आणि घरगुती रोजचे मसाले हे घरी सहज उपलब्ध असलेल्या साहित्य पासून ही रेसिपी बनवून तयार होते. आजारी व्यक्तीलाही खाल्ल्यानंतर चव चांगली येईल. ही उकडपेंडी थोडी आंबट गोड, तिखट आणि गरम अशीच चव चांगली लागते. त्यामुळे तुम्हीही ही विदर्भ स्टाईल रेसिपी नक्की ट्राय करून बघा.