'ड्राय स्किन' की 'ऑईली स्किन', तुमच्या त्वचेला सूट होणारे मॉइश्चरायझर कसे निवडाल? तज्ज्ञ सांगतात...

How to choose the right moisturizer : त्वचेची काळजी घेण्यासाठी वर्षभर मॉइश्चरायझर वापरणे खूप महत्त्वाचे आहे, पण त्याआधी आपल्या त्वचेच्या प्रकारानुसार योग्य मॉइश्चरायझर कोणते आहे हे जाणून घेणे गरजेचे आहे. योग्य काळजी घेतली नाही, तर त्वचेचं नैसर्गिक तेज लवकरच निघून जातं. म्हणूनच, त्वचा निरोगी आणि चमकदार ठेवण्यासाठी, विशेषतः रोजच्या रुटीनमध्ये मॉइश्चरायझरचा वापर करणे आवश्यक आहे.

मॉइश्चरायझर त्वचेला हायड्रेटेड ठेवण्यास मदत करते, ज्यामुळे त्वचा मऊ आणि ओलसर राहते. त्यामुळे मॉइश्चरायझरचा वापर वर्षभर केला पाहिजे, पण हिवाळ्यात त्याची गरज अधिक असते. मेकअप एक्सपर्ट सोमा दास यांच्या मते, मेकअप किंवा सनस्क्रीन लावण्यापूर्वी मॉइश्चरायझर लावणे आवश्यक आहे. पण त्याआधी तुम्हाला तुमच्या त्वचेचा प्रकार आणि त्यासाठी योग्य मॉइश्चरायझर कोणते, हे माहीत असायला हवे.

मॉइश्चरायझर निवडण्यापूर्वी तुम्हाला तुमच्या त्वचेचा प्रकार ओळखता आला पाहिजे. एकदा त्वचेचा प्रकार समजला की, तुम्ही योग्य मॉइश्चरायझर निवडू शकता, जे तुमच्या त्वचेतील ओलावा टिकवून ठेवण्यास मदत करेल.

तेलकट त्वचा (Oily Skin) : बाहेरून तेलकट वाटणारी त्वचा आतून कोरडी असू शकते. अशा त्वचेसाठी व्हिटॅमिन सी आणि सेरामाइड्स असलेले लोशन किंवा हायड्रेटिंग जेल उत्तम ठरतात.

कोरडी त्वचा (Dry Skin) : कोरड्या त्वचेसाठी थोडे जाडसर आणि क्रीमसारखे मॉइश्चरायझर चांगले असते. ते त्वचेतील ओलावा आत टिकवून ठेवण्यास मदत करते. व्हिटॅमिन सी 2 आणि ओमेगा 3 फॅटी ॲसिड्स असलेले मॉइश्चरायझर या त्वचेसाठी योग्य आहेत.

मिश्र त्वचा (Combination Skin) : काही लोकांची त्वचा मिश्र स्वरूपाची असते, जिथे कपाळ आणि नाक तेलकट असते, तर उर्वरित भाग कोरडा असतो. अशा त्वचेसाठी हायल्यूरोनिक ॲसिड असलेले मॉइश्चरायझर चांगले ठरते.

संवेदनशील त्वचा (Sensitive Skin) : अनेक लोकांची त्वचा खूप संवेदनशील असते. अशा त्वचेसाठी कोरफड (ॲलोवेरा) आणि कॅमोमाईल सारखे घटक असलेले मॉइश्चरायझर अधिक प्रभावी असतात.

या सोप्या टिप्स फॉलो करून तुम्ही तुमच्या त्वचेसाठी योग्य मॉइश्चरायझर निवडू शकता आणि तिला वर्षभर निरोगी आणि चमकदार ठेवू शकता.