Marathwada Rain: विजा कडाडणार, पाऊस झोडपणार, छ. संभाजीनगर ते नांदेड 5 जिल्ह्यांना अलर्ट

राज्यात पावसाचा जोर वाढला असून मराठवाड्यात देखील धो धो पाऊस सुरू आहे. आज 17 ऑगस्ट रोजी मराठवाड्यात विजांच्या कडकडाटासह मुसळधार पावसाचा अंदाज आहे. छत्रपती संभाजीनगरसह 5 जिल्ह्यांना हवामान विभागाने यलो अलर्ट जारी केला आहे.

रविवारी छत्रपती संभाजीनगरसह नांदेड, परभणी, हिंगोली आणि जालना या जिल्ह्यांत हलक्या ते मध्यम स्वरूपाच्या पावसाची शक्यता आहे. तर काही ठिकाणी जोरदार सरींचाही अंदाज वर्तविण्यात आला आहे. आज हवामान विभागाने या जिल्ह्यांना सतर्कतेचा यलो अलर्ट दिला असून विजांचा कडकडाट आणि ढगांच्या गडगडात जोरदार पावसाचा अंदाज आहे.

बीड, लातूर आणि धाराशिव या जिल्ह्यांत आज हलक्या ते मध्यम पावसाची शक्यता आहे. रविवारी हवामान विभागाने सतर्कतेचा कोणताही इशारा दिलेला नाही. मात्र, 24 तासानंतर हवामानात मोठे बदल जाणवणार असून मुसळधार पावसाचा अंदाज आहे. सोमवारी बीड आणि लातूरला ऑरेंज अलर्ट देण्यात आला आहे.

मराठवाड्यात पुढील 3 दिवस पावसाचा जोर कायम राहणार आहे. या काळात ताशी 30 ते 40 किमी वेगाने वारे वाहणार असून विजांच्या कडकडाटात जोरदार पावसाचा अंदाज आहे. 20 ऑगस्टनंतर हवामानात मोठे बदल जाणवतील.

दरम्यान, मराठवाड्यात पुन्हा पावसाचा जोर वाढला असून विजांसह जोरदार पाऊस कोसळतोय. त्यामुळे शेतकऱ्यांना आपल्या पिकांची योग्य ती काळजी घ्यावी लागेल. नद्या, नाल्यांना पाणी आले असल्याने योग्य ती खबरदारी घ्यावी लागेल.