Gadchiroli : सुनेनं घरातल्या 5 जणांना कसं संपवलं? गडचिरोली पोलिसांनी क्रॅक केला थरारक घटनाक्रम

गडचिरोलीच्या कुंभारे कुटुंबातील आई, वडील, मुलगा, मुलगी आणि मावशी यांचा 20 दिवसांच्या आत मृत्यू झाला. शंकर कुंभारे आणि त्यांच्या पत्नी विजया कुंभारे यांची 20 सप्टेंबरला अचानक प्रकृती बिघडली, त्यामुळे त्यांना चंद्रपूर आणि मग नागपूरच्या रुग्णालयात दाखल करण्यात आलं. पण शंकर कुंभारे यांचं 26 सप्टेंबरला आणि विजया कुंभारे यांचं 27 तारखेला निधन झालं.

आई-वडिलांच्या अंत्यविधीसाठी आलेल्या मुलगी कोमल आणि मुलगा रोशन आणि मुलांची मावशी वर्षा उराडे यांचीही प्रकृती बिघडली. उपचार घेतल्यानंतरही त्यांच्या प्रकृतीत सुधारणा होत नव्हती, अखेर कोमल, रोशन आणि वर्षा यांचाही मृत्यू झाला.

आई-वडिलांची प्रकृती ठीक नसल्याने नोकरीनिमित्त दिल्लीत वास्तव्यास असणारा मुलगा सागर चंद्रपूरला परतला. तिथे गेल्यानंतर त्याची प्रकृती बिघडली. शंकर आणि विजया कुंभारे यांना उपचारासाठी नेणाऱ्या कार चालक राकेश मडवी यालाही त्रास व्हायला लागला, त्यामुळे त्यालाही रुग्णालयात दाखल करण्यात आलं आहे.

शंकर आणि विजया रुग्णालयात असल्यामुळे मदतीला आलेल्या मेहुणीच्या मुलालाही विषबाधा झाली, त्याच्यावरही उपचार सुरू असून त्याची प्रकृती स्थिर आहे. उपचार सुरू असलेल्यांच्या हाता-पायाला मुंग्या येणे, कंबरेखालच्या भागात आणि डोक्यात प्रचंड वेदना, ओठ काळे पडणे, जीभ जड होणे, अशी लक्षणं दिसून आली. या लक्षणांमुळे मृत्यू झालेल्या आणि उपचार घेत असलेल्यांना विषबाधा झाल्याचा प्राथमिक अंदाज वैद्यकीय अधिकाऱ्यांनी वर्तवला.

संघमित्रा कुंभारेने रोशन कुंभारेसोबत आई-वडिलांच्या विरोधात जाऊन लग्न केलं, त्यामुळे संघमित्राच्या वडिलांनी आत्महत्या केली. संघमित्राला पती रोशन आणि सासरची मंडळी माहेरच्या लोकांच्या नावाने वारंवार टोमणे मारत होते.

रोझा रामटेके हिच्या सासऱ्यांच्या नावावर असलेल्या शेतजमिनीवरून शंकर कुंभारे यांच्या पत्नी आणि तिच्या इतर बहिणी हिस्सा मागून वारंवार वाद घालत होते, त्यामुळे दोघींनी कुंभारे परिवार आणि त्यांच्या नातेवाईकांना विष देऊन ठार केलं.

रोझा रामटेकेने तेलंगणामध्ये जाऊन विष आणलं. हे विष दोघींनी कुटुंबातल्यांच्या खाण्यापिण्याच्या वस्तूंमध्ये मिसळलं. या विषाचा परिणाम हळूहळू होऊ लागला, त्यानंतर घरातले सगळेच आजारी पडायला लागले. राकेश मडवी हा कुंभारे परिवारातील नव्हता, पण गाडीतील पिण्याच्या पाण्याच्या बॉटलमधील पाणी प्यायलामुळे तोही आजारी पडला.