Kolhapur News : पौर्णिमेच्या रात्री अघोरी प्रकार! स्थानिकांना संशय आल्याने भांडाफोड, पाहा PHOTO

शिरोळ तालुक्यातील गणेशवाडी इथल्या स्मशानभूमीत शुक्रवारी रात्री अघोरी कृत्याचा अग्नी पूजा रंगली होती. एका मांत्रिकासह 10 ते 15 जणांच्या उपस्थितीत अघोरी यज्ञ पार पडला. गावातील तरुणांना याची कुणकुण लागताच त्यांनी पडताळणी केल्यानंतर हा भानामती करणीचा असल्याचे लक्षात आले. त्यामुळे मांत्रिकसह यात सहभागी काही जणांना कुरुंदवाड पोलीसाच्या स्वाधीन केले. या प्रकाराने गावात मात्र भीतीचे वातावरण पसरले आहे.

पौर्णिमेच्या रात्रीचे औचित्य साधून अंदाजे 7 वाजता अंगाला अंगारा लावून मांत्रिक वेशातील एका मंत्रिकासह सांगली जिल्ह्यातील तब्बल 13 ते 15 जणांनी एक विधी केल्याची चर्चा आहे. जळावू पदार्थाचा वापर करून अग्नी पेटवून त्यासाठी यज्ञ तयार केला होता.

इच्छित विधी झाल्यानंतर ती मंडळी जायला निघाली, येथील हनुमान मंदिर जवळ लावण्यात आलेल्या एमएच 10 पासिंग असलेल्या मोटरसायकल तसेच एक रिक्षा होती. या सर्वांचा गावातील युवकांना संशय आला. त्या युवकांनी त्यांना हे काय केलंय असे विचारले असता त्यांनी पूजा केल्याचे सागितले. त्यांनतर त्यांची अधिक चौकशी करीता विधी केलेले ठिकाण पाहिले असता तेथे अघोरी कृत्य दिसून आले.

भानामती प्रकार दिसल्याने तरुणांनी त्यांच्या बॅगा पाहिल्या, त्यामधे लिंबू, कुंकू हळद, दोरा गंडे, नारळ आदी साहित्य सापडले. त्यांनतर सदर मांत्रिकासह अन्य काहीजण यांना कुरुंदवाड पोलिसांच्या ताब्यात दिले तर यातील काहीजण पळून जाण्यात यशस्वी झाले.

स्मशान भूमीत केलेले अग्नी यज्ञ तीन तासाहून अधिक वेळ धुपत होता. यामध्ये नेमके या मांत्रिकाने काय जाळले आहे. कोणता अग्नी पूजा करण्यात आली. यज्ञ इथे कश्यासाठी केले आहे? या मागचा हेतू काय? नरबळी किंवा अन्य कृती आहे का? असे अनेक प्रश्न अनुत्तरीत राहिले असून याचा शोध घेण्याची गरज आहे.