सह्याद्रीच्या जंगलात विदर्भातल्या वाघांची डरकाळी, वनविभाग मोठ्या निर्णयाच्या तयारीत

पश्चिम महाराष्ट्रातील सह्याद्री व्याघ्र प्रकल्प हा नेहमीच प्राणीप्रेमींचे आकर्षणाचे केंद्र राहिला आहे. आता याच सह्याद्रीच्या जंगलात विदर्भातील वाघांची डरकाळी ऐकायला येणार आहे. विदर्भातील व्याघ्र प्रकल्पांमध्ये वाघांची संख्या क्षमतेपेक्षा जास्त झाली आहे.

वनविभागाने त्यासाठी मोठ्या हालचाली सुरू केल्या आहेत. पहिले तीन वाघ सह्याद्रीत रमल्यानंतर पुन्हा पाच वाघ पाठवण्याची तयारी सुरू आहे. त्यासाठी राष्ट्रीय व्याघ्र प्राधिकरणाची परवानगी देखील मिळाली आहे.

सह्याद्री व्याघ्र प्रकल्पात वाघांची संख्या कमी झाली असून त्यांचे अस्तित्व नगण्य झाले होते. मात्र, निसर्ग साखळी कायम राहण्यासाठी या भागात वाघ असणे गरजेचे आहे. त्यातच विदर्भातील पेंच आणि ताडोबासारख्या व्याघ्र प्रकल्पांमध्ये वाघांची संख्या झपाट्याने वाढली आहे.

प्रादेशिक अस्तित्वासाठी या वाघांमध्ये संघर्ष होतात. हे टाळण्यासाठी तिथले 8 वाघ टप्प्याटप्प्याने सह्याद्रीच्या डोंगरात सोडण्यात येणार आहेत. विशेषत: विदर्भात व्याघ्र प्रकल्पाबाहेर जाणाऱ्या वाघिणीला सह्याद्रीत सोडण्याचे नियोजन सुरू आहे. त्यातही 4-6 वयोगटाला प्राधान्य दिले जाणार आहे.

8 पैकी तीन वाघ यापूर्वीच सह्याद्रीत आणण्यात आले आहेत. ते सह्याद्रीच्या जंगलात रमले आहेत. त्यामुळे वनविभागाचा देखील आत्मविश्वास वाढला आहे. आता सह्याद्रीत 25 ते 30 वाघांचे संगोपन केले जाऊ शकते, या दिशेने नियोजन सुरू आहे.

सह्याद्री व्याघ्र प्रकल्प वाघांसाठी राखीव असला तरी या ठिकाणी वाघांची संख्या घटली आहे. आता विदर्भातील पेंच आणि ताडोबातून या ठिकाणी 5 वाघ आणण्यात येणार आहेत. त्यामुळे वाघांची संख्या वाढल्यास पर्यटनाला वाव मिळेल.

मुंबईसह पुणे, ठाणे, कर्नाटक भागातील पर्यटक देखील वाघ पाहण्यासाठी या ठिकाणी येतील. त्यासाठी सह्याद्री परिसरातून उपवनसंरक्षक, सहायक वनसंरक्षकांचा चमू विदर्भाचा दौरा करून आला आहे.