Indian Railway : चालत्या ट्रेनमधून मोबाईल खाली पडला? घाबरु नका तो परत मिळेल, फक्त 'या' गोष्टी करा

भारतात दररोज कोट्यवधी लोक रेल्वेने प्रवास करतात. लांबचा प्रवास असो वा रोजचं ऑफिसचं अंतर ट्रेनने जाणं हे सोपं, स्वस्त आणि आरामदायी पर्याय मानलं जातं. रेल्वेचं जाळं भारताच्या एका टोकापासून दुसऱ्या टोकापर्यंत विस्तारलेलं आहे. त्यामुळे शहरं, गावं आणि राज्यं यांना जोडणारा हा वाहतुकीचा अत्यंत महत्त्वाचा आधार आहे. पण या प्रवासादरम्यान कधी कधी एखादी छोटीशी चूक मोठं संकट बनते.

जसं की चालत्या ट्रेनमधून मोबाईल खाली पडणं. अशावेळी बहुतेक लोक घाबरतात, पण शांत राहून योग्य पावलं उचलली, तर तुमचा मोबाईल परत मिळवणं पूर्णपणे शक्य आहे.

घाबरू नका आणि ट्रेनची चेन ओढू नकामोबाईल खाली पडल्याचं लक्षात आलं की लोक लगेच गोंधळतात आणि काही वेळा ट्रेन थांबवण्यासाठी चेन ओढतात. पण लक्षात ठेवा ट्रेनची चेन ओढणं हा कायदेशीर गुन्हा आहे. यासाठी 5000 रुपये दंड किंवा तुरुंगवासाची शिक्षा होऊ शकते. त्यामुळे घाबरू नका, स्वतःला शांत ठेवा आणि पुढची पावलं समजून उचला.

मोबाईल कुठे पडला ते नीट लक्षात ठेवाफोन कुठे पडला याचा अंदाज घेणं फार महत्त्वाचं आहे. खिडकीजवळ दिसणारा किलोमीटर मार्क किंवा पोल नंबर नीट बघून लक्षात ठेवा किंवा लिहून ठेवा. हा छोटासा तपशील रेल्वे पोलिसांना शोधमोहीम करताना फार मदत करतो. यामुळे त्यांना फोन शोधण्यासाठी अचूक ठिकाण कळतं.

रेल्वे हेल्पलाइनवर तात्काळ संपर्क करादुसऱ्या प्रवाशाकडून फोन घेऊन लगेच रेल्वे सुरक्षा हेल्पलाइन नंबर 182 वर कॉल करा. हा नंबर रेल्वे प्रोटेक्शन फोर्सचा (RPF) 24x7 हेल्पलाइन आहे.फोन करताना खालील माहिती द्या:

गाडीचं नाव आणि क्रमांकफोन पडलेली जागा (पोल नंबर किंवा किलोमीटर मार्क)वेळ आणि प्रवासाचं ठिकाण

जर हा नंबर लागला नाही, तर 1512 (GRP हेल्पलाइन) किंवा 138 (रेल्वे प्रवासी हेल्पलाइन) वरही कॉल करू शकता. अधिकारी ही माहिती घेताच त्या परिसरात शोधमोहीम सुरू करतात.

तक्रारीचा रेफरन्स नंबर जतन करातक्रार केल्यानंतर तुम्हाला एक रेफरन्स नंबर मिळतो. या नंबरच्या मदतीने तुम्ही तुमच्या तक्रारीची स्थिती ऑनलाइन किंवा जवळच्या रेल्वे स्टेशनवर तपासू शकता. मोबाईल सापडल्यानंतर तुमचा ओळखपत्र आणि मोबाईलची माहिती देऊन तो परत मिळवता येतो.

थोडक्यात सांगायचं तर, रेल्वे प्रवासात जर तुमचा फोन चुकून खाली पडला, तरी तो कायमचा गेला असं समजू नका. योग्य पद्धतीने आणि शांततेने काम केल्यास रेल्वे प्रशासन तुमची मदत करेल आणि तुमचं डिव्हाइस परत मिळवणं शक्य आहे.