Mental Health: चुकीच्या सवयी की यश मिळवण्याची लालसा, कोणत्या गोष्टी तुमच्यासाठी घातक?

सध्याच्या स्पर्धात्मक काळात तग धरून राहण्याच्या प्रक्रियेमध्ये तरुणाई स्ट्रेस आणि डिप्रेशनला बळी पडत आहे. अलीकडच्या काळात तर किरकोळ कारणांमुळेही तरुण मानसिक तणावात जात आहेत. यामागे वैयक्तिक, सामाजिक आणि जीवनशैलीशी संबंधित अनेक कारणं असल्याचं मत तज्ज्ञांनी व्यक्त केलं आहे.

तज्ज्ञांच्या मते, आजच्या पिढीमध्ये लवकरात लवकर यश मिळवण्याची मानसिकता वाढली आहे. मोठा बंगला, गाडी, प्रतिष्ठा हे मिळवण्यासाठी वेळ लागतो. या गोष्टींचा जीवनातील वेगवेगळ्या टप्प्यावर अनुभव घेणं गरजेचं आहे. पण, सध्याची पिढी असा विचार करत नाही. त्यांना भौतिक सुखाच्या सर्व गोष्टी फार कमी वयात मिळवण्याची इच्छा असते.

करिअरच्या मागे धावताना अनेक जण वैयक्तिक आयुष्यातील महत्त्वाचे निर्णय पुढे ढकलतात. यामुळे हार्मोन्सच्या पातळीत बदल होतो आणि मानसिक आरोग्यावर विपरीत परिणाम होतो. लग्न, नोकरी, इतर जबाबदाऱ्या या गोष्टी योग्य वयात पार पडल्या पाहिजेत.

आहाराच्या चुकीच्या सवयींचा देखील मानसिक आरोग्यावर परिणाम होतो. फास्ट फूड खाण्याचं प्रमाण वाढल्याने कोलेस्टेरॉल वाढते आणि आवश्यक जीवनसत्त्वांचा (व्हिटॅमिन्स) अभाव निर्माण होतो. रक्ताच्या आणि व्हिटॅमिनच्या कमतरतेमुळे मेंदूवर ताण येतो, विचारांचा ओघ वाढतो आणि मानसिक थकवा येतो.

सध्याच्या तरुण पिढीला व्यायामाची सवय नाही. कोणत्याही प्रकारचा व्यायाम न करता ते कामाचा प्रचंड ताण सहन करतात. परिणामी शरीर आणि मन दोन्ही थकलेले असते. योग्य आहार, नियमित व्यायाम आणि वेळेचं व्यवस्थापन केल्यास मानसिक आरोग्य सुधारू शकतं. सकारात्मक जीवनशैली स्वीकारल्यास डिप्रेशनपासून दूर राहून यशाच्या मार्गावर चालता येईल, असा सल्ला तज्ज्ञ देतात.