Weather Alert : महाराष्ट्रावर बुधवारी कोल्ड वेव्हचं संकट, 11 जिल्ह्यांना अलर्ट

राज्यात थंडीच्या तीव्र लाटेची शक्यता हवामान विभागाने वर्तवली आहे. 9, 10 आणि 11 डिसेंबर रोजी राज्यातील बहुतेक जिल्ह्यांमध्ये तापमान अगदी 7 अंश सेल्सिअसपर्यंत निम्न स्तरावर पोहोचू शकते. त्यामुळे नागरिकांनी काळजी घ्यावी. पाहुयात 10 डिसेंबरला राज्यातील वातावरण कसे असेल.

मुंबई शहर आणि उपनगरात देखील गारठ्यात कमालीची वाढ झाली आहे. 10 डिसेंबर रोजी मुंबईत मुख्यतः निरभ्र आकाश राहील आणि किमान तापमान 15 अंश सेल्सिअस इतके असेल. कोकणात देखील हीच परिस्थिती असेल.

पुण्यासह पश्चिम महाराष्ट्रात गारठा तीव्रतेने वाढणार आहे. पुण्यात तर किमान तापमान 8 अंश सेल्सिअस एवढी नीचांकी नोंदवले जाईल. तर यापुढील दोन दिवस तापमान केवळ 7 अंश सेल्सिअस राहील. त्यामुळे पश्चिम महाराष्ट्रातील नागरिकांनी वाढत्या थंडीच्या कडाक्यापासून स्वतःचे संरक्षण करणे आवश्यक आहे. पुणे आणि सोलापूरला यलो अलर्ट जारी करण्यात आला आहे.

संपूर्ण उत्तर महाराष्ट्राला थंडीच्या लाटेचा इशारा देण्यात आला आहे. नंदूरबार, धुळे, जळगाव, नाशिक आणि अहिल्यानगर अशा पाचही जिल्ह्यांत कमालीचा गारठा जाणवणार आहे. नाशिकमध्ये 7 तर जळगावमध्ये पारा 6 अंश सेल्सिअसवर येण्याची शक्यता आहे.

मराठवाड्यात देखील कमालीचा गारठा जाणवत आहे. सकाळी आणि रात्री तीव्र गारवा तर दुपारी तितकेच तीक्ष्ण ऊन पहायला मिळत आहे. 10 डिसेंबर रोजी छत्रपती संभाजीनगरसह जालना, बीड आणि परभणीला कोल्ड वेव्हचा यलो अलर्ट जारी करण्यात आला आहे.

विदर्भातील गारठ्यात काहीशी घट झाली आहे. यवतमाळ, गोंदिया आणि नागपूरमध्ये 9 डिसेंबर रोजी शीतलहरीचा अनुभव यायला मिळाला. 10 डिसेंबर रोजी विदर्भातील कोणत्याही जिल्ह्यात कोल्ड वेव्ह नसेल. नागपूरमध्ये किमान तापमान 9 अंश सेल्सिअस इतके नीचांकी असेल. तर अमरावतीत किमान तापमान 11 अंश सेल्सिअस राहील.

दरम्यान, 11 डिसेंबरपर्यंत राज्यात अनेक ठिकाणी कोल्ड वेव्हचा इशारा देण्यात आला असल्याने प्रशासनाने नागरिकांना खबरदारी घेण्याचा सल्ला दिला आहे. तसेच वृद्ध आणि लहान मुलांची काळजी घेण्याचे आवाहन करण्यात आले आहे.