Weather Alert : राज्यात शुक्रवारचा दिवस मुसळधार पावसाचा, 23 जिल्ह्यांना हवामान विभागाचा अलर्ट

राज्यातील मुंबई, पुणे आणि नाशिक अशा मोठ्या शहरांबरोबरच पालघर, ठाणे, रायगड, रत्नागिरी आणि सिंधुदुर्ग त्याच पद्धतीने कोल्हापूरच्या घाटमाथ्यावर मुसळधार पाऊस होत असल्याचे पाहायला मिळत आहे. या जिल्ह्यांना हवामान विभागाने अतिमुसळधार पावसाचा इशारा दिला आहे.

नाशिक आणि पुण्याच्या घाट परिसर तसेच पालघर जिल्ह्याला पुढील काही तासांसाठी हवामान विभागाने रेड अलर्ट जारी केला आहे. तर विदर्भ आणि मराठवाड्यातील काही जिल्ह्यांमध्येही जोरदार पावसाची शक्यता हवामान विभागाने वर्तवली आहे. पुढील 24 तासांत राज्यात हवामानाची स्थिती कशी असेल पाहुयात.

मुंबई शहर आणि उपनगरांमध्ये 20 जून रोजी सामान्यतः ढगाळ आकाश राहील, तर तुरळक ठिकाणी हलक्या ते मध्यम पावसाची शक्यता आहे. तर कोकण विभागातील सर्व जिल्ह्यांना हवामान विभागाने यलो अलर्ट जारी केला असून अनेक ठिकाणी मुसळधार पावसाची शक्यता वर्तवली आहे.

पालघर, ठाणे, रायगड, रत्नागिरी आणि सिंधुदुर्ग या सर्व जिल्ह्यांमध्ये तुरळक ठिकाणी मुसळधार पावसाची शक्यता आहे. पश्चिम महाराष्ट्राच्या बाबतीत बोलायचं झाल्यास पुण्याच्या घाट परिसराला 20 जून रोजी ऑरेंज अलर्ट देण्यात आला आहे. त्याचबरोबर सातारा आणि कोल्हापूरच्या घाट परिसरात मुसळधार पावसाची शक्यता आहे.

तर सातारा, सांगली, सोलापूर आणि कोल्हापूर जिल्ह्यांमध्ये तुरळक ठिकाणी हलका ते मध्यम पाऊस होऊ शकतो. उत्तर महाराष्ट्रातील नाशिकमध्येही घाट भागावर मुसळधार पावसाची शक्यता असून धुळे, नंदुरबार, जळगाव आणि अहिल्यानगरमध्ये तुरळक पाऊस होऊ शकतो.

मराठवाड्यातील लातूर, धाराशिव आणि बीड या जिल्ह्यांना हवामान विभागाने यलो अलर्ट जारी केला आहे. संभाजीनगर, जालना, परभणी, हिंगोली आणि नांदेड या जिल्ह्यांत तुरळक ठिकाणी जोरदार तर काही ठिकाणी मध्यम पावसाची शक्यता आहे.

विदर्भातील सर्व 11 जिल्ह्यांना हवामान विभागाने यलो अलर्ट जाहीर केला आहे. या जिल्ह्यांमध्ये वादळी वाऱ्यासह आणि विजांच्या कडकडाटासह मध्यम ते जोरदार पावसाची शक्यता आहे.