Weather Alert : बुधवारी महाराष्ट्रात वादळी वाऱ्यासह मुसळधार पाऊस, 29 जिल्ह्यांना अलर्ट

राज्यातील सर्वच भागांत गेल्या काही दिवसांत संमिश्र वातावरण बघायला मिळत आहे. काही ठिकाणी पाऊस तर काही ठिकाणी उन्हाचा तडाखा नागरिकांना सहन करावा लागत आहे. 29 ऑक्टोबर रोजी राज्यात मुसळधार पावसाची शक्यता वर्तवण्यात आली आहे. अनेक जिल्ह्यांत विजांच्या कडकडाटासह आणि वादळी वाऱ्यासह मुसळधार ते अति मुसळधार पावसाचा इशारा देण्यात आला आहे. काही जिल्ह्यांसाठी यलो तर काही ठिकाणी ऑरेंज अलर्ट जारी करण्यात आला आहे. पाहुयात 29 ऑक्टोबर रोजी राज्यातील हवामानाची स्थिती कशी राहील.

मुंबईसह कोकण विभागातही वादळी पावसाचा इशारा देण्यात आला आहे. पालघर, ठाणे, मुंबई, रायगड, रत्नागिरी आणि सिंधुदुर्ग या जिल्ह्यांमध्ये विजांच्या कडकडाटासह आणि वादळी वाऱ्यासह हलक्या ते मध्यम स्वरूपाच्या पावसाची शक्यता वर्तवण्यात आली आहे. या सर्व जिल्ह्यांसाठी यलो अलर्ट जारी करण्यात आला आहे.

पश्चिम महाराष्ट्रातील पुणे आणि सातारा जिल्ह्यांत विजांच्या कडकडाटासह आणि वादळी वाऱ्यासह हलक्या ते मध्यम स्वरूपाच्या पावसाची शक्यता वर्तवण्यात आली आहे. तर पुणे आणि सातारा घाटमाथा परिसरात मुसळधार पावसाची शक्यता असून या चारही ठिकाणी यलो अलर्ट जारी करण्यात आला आहे. कोल्हापूर, सांगली आणि सोलापूर जिल्ह्यांत ढगांच्या गडगडाटासह हलक्या ते मध्यम स्वरूपाच्या पावसाची शक्यता वर्तवण्यात आली आहे.

मराठवाड्यातील छत्रपती संभाजीनगर, बीड, नांदेड, लातूर आणि धाराशिव जिल्ह्यांत हलक्या ते मध्यम स्वरूपाच्या पावसाची शक्यता असल्याचं हवामान विभागानं सांगितलंय. तर जालना, परभणी आणि हिंगोली जिल्ह्यांत विजांच्या कडकडाटासह मुसळधार पावसाचा इशारा देण्यात आला आहे. मराठवाड्यातील सर्वच जिल्ह्यांना पावसाचा यलो अलर्ट जारी करण्यात आला आहे.

उत्तर महाराष्ट्रातील धुळे, नंदुरबार आणि जळगाव जिल्ह्यांत हलक्या ते मध्यम स्वरूपाच्या पावसाची शक्यता आहे. तर नाशिक आणि नाशिक घाटमाथा परिसरात मुसळधार पावसाची शक्यता वर्तवण्यात आली आहे. यासर्वच ठिकाणी यलो अलर्ट जारी करण्यात आला आहे.

विदर्भातील अकोला, अमरावती, भंडारा, बुलढाणा, नागपूर, वर्धा आणि वाशिम जिल्ह्यांत काही ठिकाणी हलका ते मध्यम, तर काही ठिकाणी मुसळधार पावसाची शक्यता वर्तवण्यात आली आहे. यासर्व जिल्ह्यांसाठी यलो अलर्ट जारी करण्यात आला आहे. तर चंद्रपूर, गडचिरोली, गोंदिया आणि यवतमाळ जिल्ह्यांसाठी ऑरेंज अलर्ट जारी करण्यात आला आहे. या भागांत वादळी वाऱ्यासह मुसळधार ते अति मुसळधार पावसाची शक्यता हवामान विभागाने वर्तवली आहे.

राज्यातील विविध भागांत मुसळधार पावसाची शक्यता वर्तवण्यात आली आहे. त्यामुळे नागरिकांनी हवामान विभागाच्या सूचनांचे पालन करणे आवश्यक आहे.