Weather Alert : महाराष्ट्राची आता पावसातून होणार सुटका, पण अजूनही संकट कायम, 3 जिल्ह्यांना अलर्ट

5 ऑक्टोबर रोजी राज्यात ढगाळ वातावरणासह हलक्या ते मध्यम स्वरूपाच्या पावसाची शक्यता हवामान विभागाने वर्तवली आहे. कोकण, पश्चिम महाराष्ट्र, मराठवाडा आणि उत्तर महाराष्ट्रात हलक्या ते मध्यम स्वरूपाच्या पावसाची शक्यता आहे. तर विदर्भातील काही जिल्ह्यांत पावसाचा जोर कायम राहणार आहे. विदर्भातील तीन जिल्ह्यांत विजांच्या कडकडाटासह वादळी वाऱ्यासह पावसाचा अंदाज असल्याने यलो अलर्ट जारी करण्यात आला आहे. पाहुयात 5 ऑक्टोबर रोजी राज्यात हवामानाची स्थिती कशी राहील.

मुंबईत 5 ऑक्टोबर रोजी हलक्या ते मध्यम स्वरूपाच्या पावसाची शक्यता वर्तवण्यात आली आहे. कोकण विभागातील इतर जिल्ह्यांत म्हणजेच पालघर, ठाणे, रायगड, रत्नागिरी आणि सिंधुदुर्ग या ठिकाणी हलक्या ते मध्यम स्वरूपाच्या पावसाची शक्यता वर्तवण्यात आली आहे.

पश्चिम महाराष्ट्रातील पुणे, कोल्हापूर, सातारा, सांगली आणि सोलापूर जिल्ह्यांमध्ये हलक्या स्वरूपाचा पाऊस होण्याचा अंदाज आहे. विशेषतः घाटमाथा परिसरात हलक्या ते मध्यम स्वरूपाचा पाऊस पडू शकतो. पुण्यात अंशतः ढगाळ वातावरण राहण्याची शक्यता आहे.

मराठवाड्यातील छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांमध्ये ढगांच्या गडगडाटासह हलक्या ते मध्यम स्वरूपाच्या पावसाची शक्यता हवामान विभागाने वर्तवली आहे. काही ठिकाणी विजांचा कडकडाट आणि वादळी वारे अनुभवायला मिळू शकतात.

उत्तर महाराष्ट्रातील धुळे, नंदुरबार, जळगाव, नाशिक आणि अहिल्यानगर जिल्ह्यांत हलक्या स्वरूपाचा पाऊस पडण्याचा अंदाज आहे. नाशिकमध्ये वातावरण ढगाळ राहण्याची शक्यता आहे. तसेच घाटमाथा परिसरात मध्यम स्वरूपाच्या पावसाची शक्यता वर्तवण्यात आली आहे.

विदर्भातील बहुतांश जिल्ह्यांत कुठलीही पावसाची शक्यता नाही. त्यात अकोला, अमरावती, भंडारा, बुलढाणा, नागपूर, वर्धा, वाशिम आणि यवतमाळ या जिल्ह्यांचा समावेश आहे. या भागांत आकाश स्वच्छ राहून हवामान कोरडे राहण्याची शक्यता आहे. पूर्व विदर्भातील चंद्रपूर, गडचिरोली आणि गोंदिया जिल्ह्यांमध्ये वादळी वाऱ्यासह आणि विजांच्या कडकडाटासह पावसाची शक्यता आहे.या भागांसाठी हवामान विभागाने यलो अलर्ट जारी केला आहे. नागरिकांनी सावधगिरी बाळगण्याचे आवाहन करण्यात आले आहे.

5 ऑक्टोबर रोजी राज्यात काही ठिकाणी पावसाची हजेरी लागणार आहे. मराठवाडा, कोकण आणि विदर्भातील काही जिल्ह्यांत ढगांच्या गडगडाटासह पावसाची शक्यता असल्याने शेतकऱ्यांनी आणि नागरिकांनी हवामान विभागाच्या सूचनांकडे लक्ष द्यावे, असे आवाहन करण्यात आले आहे.