Weather Alert : वादळी वारे अन् विजांचा कडकडाट, राज्यात 22 जिल्ह्यांना यलो अलर्ट

जून महिन्याच्या सुरुवातीपासूनच पावसाचा लपंडाव सुरू आहे. राज्यातील काही भागांत चांगला पाऊस पडतोय, तर काही भागांत शेतकरी अजूनही पावसाच्या प्रतीक्षेत आहे. हवामान विभागाकडून दररोज पावसाची शक्यता वर्तवण्यात येत आहे. 27 जून रोजीही राज्यातील विविध भागांत पावसाची शक्यता असल्याचं हवामान विभागानं सांगितलंय. पाहुयात 27 जून रोजी राज्यात हवामानाची स्थिती कशी राहील.

कोकण विभागातील तुरळक ठिकाणी मुसळधार पावसाची शक्यता हवामान विभागानं वर्तवली आहे. मुंबई, पालघर, ठाणे आणि सिंधुदुर्ग जिल्ह्यांत तुरळक ठिकाणी मुसळधार पावसाची शक्यता असल्यानं पावसाचा यलो अलर्ट जारी करण्यात आला आहे. तर रायगड आणि रत्नागिरी या दोन जिल्ह्यांसाठी ऑरेंज अलर्ट जारी करण्यात आला आहे.

पश्चिम महाराष्ट्रातील पुणे, सोलापूर, कोल्हापूर, सातारा, सांगली या सर्व जिल्ह्यांत हलक्या ते मध्यम स्वरूपाच्या पावसाची शक्यता आहे. पुणे घाटमाथा आणि सातारा घाटमाथा या दोन्ही ठिकाणी मुसळधार पावसाची शक्यता असल्यानं पावसाचा ऑरेंज अलर्ट जारी करण्यात आला आहे. तसेच कोल्हापूर माथ्यावर यलो अलर्ट जारी करण्यात आला आहे.

मराठवाड्यातील छत्रपती संभाजीनगर आणि जालना या दोन्ही जिल्ह्यांत तुरळक ठिकाणी वादळी वाऱ्यासह आणि विजांच्या कडकडाटासह पावसाची शक्यता आहे. त्यामुळे पावसाचा यलो अलर्ट जारी करण्यात आला आहे. इतर उर्वरित जिल्ह्यांत हलक्या ते मध्यम स्वरूपाच्या पावसाची शक्यता आहे.

उत्तर महाराष्ट्रातील नाशिकमध्ये मध्यम स्वरूपाच्या पावसाची शक्यता आहे. धुळे, नंदुरबार, जळगाव, नाशिक घाटमाथा या सर्व ठिकाणी वादळी वाऱ्यासह आणि विजांच्या कडकडाटासह मध्यम स्वरूपाच्या पावसाची शक्यता आहे. त्यामुळे या सर्व जिल्ह्यांना पावसाचा यलो अलर्ट जारी करण्यात आला आहे.

विदर्भातील सर्व जिल्ह्यांना पावसाचा यलो अलर्ट जारी करण्यात आला आहे. नागपूर आणि भंडारा या दोन जिल्ह्यांत तुरळक ठिकाणी वादळी वाऱ्यासह आणि विजांच्या कडकडाटासह मुसळधार पावसाची शक्यता आहे.

अकोला, अमरावती, बुलढाणा, चंद्रपूर, गडचिरोली, गोंदिया, वर्धा, वाशिम, यवतमाळ या जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. राज्यातील काही भागांत मुसळधार पावसाची शक्यता हवामान विभागानं वर्तवली आहे. त्या भागातील नागरिकांनी सतर्कता बाळगणे गरजेचे आहे.