Sharad Mohol : पुण्यात शरद मोहोळच्या श्रद्धांजलीचे लावले बॅनर, 'देशभक्त' असा उल्लेख

पुण्यातील हत्या झालेला गुंड शरद मोहोळला श्रद्धांजली वाहणारे बॅनर पुण्यातील धनकवडी भागात लावण्यात आले आहेत. या फ्लेक्स वर शरद मोहोळचा देशभक्त असा उल्लेख करण्यात आलाय. शरद मोहोळला श्रद्धांजली वाहणाऱ्या या बॅनरची आता पुण्यात चर्चा सुरू आहे.

शरद मोहोळच्या हत्येनंतर नितेश राणेंसह भाजपच्या अनेक नेत्यांनी शरद मोहोळची पत्नी स्वाती मोहोळ यांची भेट घेतली होती. शरद मोहोळ हा हिंदुत्वासाठी काम करत होता असा दावाही केला जात आहे. दरम्यान, एका गुंडाच्या हत्येनंतर लावण्यात आलेल्या या होर्डिंगकडे पोलिसांनीसुद्धा दुर्लक्ष केल्याने भुवया उंचावल्या आहेत.

शरद मोहोळ हत्या प्रकरणी ८ जणांना अटक करण्यात आली असून त्यापैकी ६ जणांच्या पोलीस कोठडीत आणखी सात दिवसांची वाढ करण्यात आली आहे.

हल्लेखोरांनी शरद मोहोळची हत्या सीसीटीव्ही असलेल्या भागातच केली. सीसीटीव्हीसमोर हत्या करून दहशत पसरवण्याचा त्यांचा उद्देश होता असं तपास अधिकाऱ्यांनी म्हटलं आहे.

शरद मोहोळची हत्या होण्याआधीही हल्लेखोरांनी त्याला एकटा गाठून ठार करण्याचा प्रयत्न केला होता. पण हल्लेखोरांचा प्लॅन यशस्वी झाला नव्हता.

शरद मोहोळने तुरुंगात असताना दहशतवाद्याची नाडीने गळा आवळून हत्या केली होती. मात्र या प्रकरणात तो सबळ पुराव्याअभावी निर्दोष सुटला होता. यानंतर त्याची हिंदुत्ववादी अशी प्रतिमा तयार झाली होती.