Weather Alert: विजा कडाडणार, पश्चिम महाराष्ट्रात धो धो कोसळणार, 4 जिल्ह्यांना यलो अलर्ट

पावसाच्या उघडिपीमुळे कमाल तापमानाचा पारा तिशीपार असून, उन्हाचा चटका आणि उकाडा तापदायक ठरत आहे. आज 18 जुलै रोजी पश्चिम महाराष्ट्र आणि मराठवाड्याच्या दक्षिणेकडील जिल्ह्यांत विजांसह पावसाची शक्यता असल्याने हवामान विभागाने दक्षतेचा इशारा दिला आहे. उर्वरित राज्यातही विजांसह हलक्या सरींची शक्यता वर्तविण्यात आली आहे.

मागील 24 तासात पुणे जिल्ह्यात पावसाची उघडीप राहिली. यावेळी कमाल तापमानाचा पारा 31.2 अंश सेल्सिअसवर पोहोचला. पुढील 24 तासात पुणे घाटमाथ्यावर हलका पाऊस राहील. उर्वरित जिल्ह्यात ढगाळ आकाशासह हलक्या पावसाची शक्यता हवामान विभागाने वर्तवली आहे.

सातारा जिल्ह्यात मागील 24 तासात हलका पाऊस कोसळला. सातारा परिसरामध्ये 0.6 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 29 अंश सेल्सिअस राहिल. सातारा जिल्ह्यामध्ये ढगाळ आकाश आणि विजांसह पावसाचा अंदाज हवामान विभागाने वर्तवला आहे.

कोल्हापूर परिसरात 0.1 मिलीमीटर पाऊस नोंदविण्यात आला. कमाल तापमानात वाढ झाली असून गुरुवारी ते 29.6 अंश सेल्सिअस राहिले. पुढील 24 तासात कमाल तापमान 29 अंशावर स्थिर राहणार अशून विजांसह पावसाचा यलो अलर्ट हवामान विभागाने दिला आहे.

सोलापूर जिल्हात पावसाची उघडीप कायम असून जिल्ह्यातील कमाल तापमान वाढ होत आहे. मागील 24 तासात 32.4 अंश तापमानाची नोंद सोलापूर मध्ये झाली. पुढील 24 तासात कमाल तापमानाचा पारा 34 अंशावर राहणार आहे. आज ढगाळ आकाशासह एक दोन वेळा गडगडाटी पावसाची शक्यता आहे. त्यामुळे हवामान विभागाने दक्षतेचा यलो अलर्ट जारी केला आहे.

मागील 24 तासात सांगली जिल्ह्यात पावसाची उघडीप राहिली. पुढील 24 तासात सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 32 तर किमान तापमान 24 अंश सेल्सिअस इतके राहील.

पश्चिम महाराष्ट्रातील सर्वच जिल्ह्यांत आकाश साधारणपणे ढगाळ राहील. सातारा, सांगली, सोलापूर आणि कोल्हापूर जिल्ह्यांत विजांसह पावसाची शक्यता असल्याने दक्षतेचा यलो अलर्ट भारतीय हवामान विभागाने दिला आहे. त्यामुळे नागरिकांना योग्य ती काळजी घ्यावी लागेल.