T20 World Cup : 6 फूट 8 इंचाचा क्रिकेटर काळ बनून आला, चॅम्पियन ऑस्ट्रेलियाला दिवसा तारे दाखवून गेला!

झिम्बाब्वेच्या 6 फूट 8 इंचाच्या बॉलरने ऑस्ट्रेलियाचं कंबरडं मोडून त्यांना गुडघ्यावर आणलं. भेदक स्पीड आणि अचूक लाईन ऍन्ड लेन्थने बॉलिंग करत त्याने ऑस्ट्रेलियाला एकामागोमाग एक धक्के दिले, ज्यातून कांगारू कधी सावरलेच नाहीत.

झिम्बाब्वेच्या या विजयाचा हिरो ठरला ब्लेसिंग मुझरबानी. 6 फूट 8 इंच उंची असणाऱ्या मुझरबानीने 4 ओव्हरमध्ये 17 रन देऊन 4 विकेट घेतल्या. मुझरबानीची टी-20 आंतरराष्ट्रीय क्रिकेटमधली ही सर्वोत्तम कामगिरी आहे.

मुझरबानीने त्याच्या स्पेलमध्ये जॉश इंग्लिस, टीम डेव्हिड, मॅट रॅनशो आणि ऍडम झम्पा यांची विकेट घेतली. करिअरमधल्या या सर्वोत्तम कामगिरीमुळे ब्लेसिंग मुझरबानीला प्लेअर ऑफ द मॅच देऊन गौरवण्यात आलं.

उंचीमुळे मुझरबानीला बॉलिंगमध्ये बाऊन्स मिळतो, ज्यामुळे बॅटर अनेकदा अडचणीत येतात. मुझरबानीच्या या कौशल्यामुळे तो झिम्बाब्वेकडून टेस्ट, वनडे आणि टी-20 या तिन्ही फॉरमॅटमध्ये खेळतो.

मुझरबानीच्या या भेदक बॉलिंगमुळे आरसीबीने त्याला मागच्या मोसमात विकत घेतलं. लुंगी एनगिडीला दुखापत झाल्यानंतर आरसीबीने मुझरबानीला 75 लाख रुपयांमध्ये टीममध्ये आणलं, पण त्याला एकही सामना खेळण्याची संधी मिळाली नाही.

जगभरातल्या वेगवेगळ्या टी-20 लीगमध्ये मुझरबानीने स्वत:ची ओळख निर्माण केली. याचा फायदा त्याला ऑस्ट्रेलियाविरुद्धच्या सामन्यात झाला. 2017 साली मुझरबानीने दक्षिण आफ्रिकेविरुद्ध टेस्ट क्रिकेटमध्ये पदार्पण केलं.

मुझरबानीने झिम्बाब्वेकडून 18 टेस्ट, 57 वनडे आणि 85 टी-20 आंतरराष्ट्रीय मॅच खेळला आहे. टेस्टमध्ये त्याने 26.20 च्या सरासरीने 67 विकेट घेतल्या. तर वनडेमध्ये 33.35 च्या सरासरीने 70 आणि टी-20 आंतरराष्ट्रीय मध्ये 21.08 च्या सरासरीने आणि 7.10 च्या इकोनॉमी रेटने 100 विकेट मिळवल्या.