Team India : 3 खेळाडू बेदम फोडणार, दोघं सांभाळणार... टीम इंडियाचा T20 वर्ल्ड कपचा प्लान लिक!

टीम इंडिया यंदा वर्ल्ड चॅम्पियन बनली तर टी-20 क्रिकेटच्या इतिहासात नवा विक्रम होईल, कारण कोणत्याही टीमला लागोपाठ 2 वेळा टी-20 वर्ल्ड कप जिंकता आलेला नाही. एवढंच नाही तर कोणतीही टीम 3 टी-20 वर्ल्ड कप जिंकलेली नाही.

मागच्या टी-20 वर्ल्ड कपमध्ये रोहित शर्मा कर्णधार आणि राहुल द्रविड कोच होता, तर यंदा सूर्यकुमार यादवकडे नेतृत्व आणि गौतम गंभीरकडे प्रशिक्षकपदाची धुरा आहे.

नामिबियाविरुद्धच्या सामन्याआधी टीम इंडियाचा खेळाडू तिलक वर्मा याने भारतीय टीमने वर्ल्ड कपसाठी केलेल्या प्लानिंगचे संकेत दिले आहेत, ज्यात 3 खेळाडूंना आक्रमक बॅटिंग करण्याची मूभा देण्यात आली आहे. तर दोन खेळाडू सावध खेळणार आहेत.

वर्ल्ड कपच्या पहिल्याच सामन्यात भारतीय टीमला त्यांच्या प्लानबद्दल पुनर्विचार करावा लागला होता. युएसएविरुद्ध टीम इंडियाने 77 रनवरच 6 विकेट गमावल्या होत्या, अखेर सूर्यकुमार यादवने टीमला संकटातून बाहेर काढलं.

ओपनर अभिषेक शर्मा आणि इशान किशन यांना सुरूवातीपासूनच आक्रमक बॅटिंग करण्याची मुभा देण्यात आली आहे. संजू सॅमसनच्या बॅटिंगची स्टाईलही तशीच आहे. जर हे खेळाडू चालले टीम इंडियाचा प्लान ए यशस्वी होईल.

आक्रमक बॅटिंग करण्याच्या नादात हे खेळाडू आऊट झाले तर तिसऱ्या आणि चौथ्या क्रमांकावर बॅटिंग करणाऱ्या तिलक वर्मा आणि सूर्यकुमार यादवला इनिंग सावरण्याची जबाबदारी देण्यात आली आहे.

टी-20 क्रिकेटमध्ये पॉवर प्ले नंतर 6 ते 16 ओव्हर या महत्त्वाच्या ठरतात, कारण या ओव्हरमध्ये जी टीम चांगली खेळते त्यांच्या विजयाची संधी जास्त असते. विकेट लवकर गेल्या तर एक-दोन ओव्हर सांभाळून खेळण्याची गरज असल्याचं कोच गौतम गंभीरही म्हणाला आहे.