Indian Railway : ब्रेकफास्ट, लंच, डिनर सगळं FREE, चवही भारी! महाराष्ट्रातून सुटणारी भारतातील एकमेव ट्रेन; लगेच नोट करा नाव, स्टेशन, वेळ

किती तरी लोक ट्रेनने प्रवास करतात आणि या प्रवासात ट्रेनचं खायचं म्हटलं की त्यासाठी वेगळे पैसे मोजावे लागतात. शिवाय कित्येक प्रवाशांची तक्रार असते हे जेवण निकृष्ट दर्जाचं असतं. पण भारतातील एक अशी एकमेव ट्रेन ज्यात ब्रेकफास्टपासून डिनरपर्यंत सगळं फ्री मिळतं. मोफत असलं तरी हे जेवण इतकं चविष्ट असतं की बोटं चाटून खाल.

भारतातील एक अशी ट्रेन जी गेल्या 29 वर्षांपासून प्रवाशांना मोफत जेवण देत आहे. यात नाश्ता, दुपारचं जेवण आणि रात्रीचं जेवण समाविष्ट आहे. विशेष म्हणजे स्लीपर ते एसी क्लासपर्यंतचे प्रवासी मोफत जेवणाचा आनंद घेऊ शकतात. 2000 किमीच्या मार्गावर सहा ठिकाणी हे अन्न उपलब्ध आहे.

हे जेवण साधं पण पौष्टिक, पूर्णपणे शाकाहारी आणि ताजं तयार केलेलं असतं. नाश्त्यात अनेकदा खिचडी किंवा डाळ आणि भात असे हलके पदार्थ असतात. दुपारच्या जेवणात आणि रात्रीच्या जेवणात कडी आणि भात, हरभरा, डाळ, बटाटा-फुलकोबी किंवा हंगामी हिरव्या भाज्या असतात.

भारतीय रेल्वेचे माहिती आणि प्रसिद्धी विभागाचे कार्यकारी संचालक दिलीप कुमार यांनी सांगितलं की या ट्रेनमध्ये मिळणाऱ्या मोफत जेवणाचा रेल्वेशी काहीही संबंध नाही. हे जेवण गुरुद्वारांकडून मिळणाऱ्या देणग्यांमधून तयार केलं जातं. जर कोणी स्वेच्छेने प्रवाशांना जेवण देऊ इच्छित असेल तर भारतीय रेल्वेला कोणताही आक्षेप नाही.

पण गुरुद्वारा परंपरेनुसार ट्रेनमधील हे जेवण घेण्यासाठी प्रवाशांना स्वतःची भांडी आणावी लागतील, कारण ती लंगर देण्याचा एक मोफत आणि आदरणीय मार्ग आहे.

आता ही ट्रेन कोणती हे जाणून घेण्याची उत्सुकता तुम्हाला असते. ही ट्रेन आहे सचखंड एक्सप्रेस (12715). जी श्री हजूर साहिब गुरुद्वारा नांदेड ते श्री हरमंदिर साहिब गुरुद्वारा अमृतसरपर्यंत धावते. ही ट्रेन नांदेडहून दररोज सकाळी 9.30 वाजता सुटते आणि दुसऱ्या दिवशी रात्री 9.45 ला अमृतसरला पोहोचते.

नांदेड हे दहावे गुरु श्री गुरु गोविंद सिंहजी यांचं अंतिम विश्रांतीस्थान आहे आणि हा मार्ग शिखांसाठी खूप खास आहे. या ट्रेनमध्ये प्रवास करण्यासाठी फक्त तिकीट शुल्क भरावं लागतं आणि जेवण मोफत दिलं जातं.