Success Story :घवघवीत यश! चार पिढ्यांनी मजुरीतच वेचलं आयुष्य; आता ऊसतोड कामगाराचा मुलगा बनला 'अग्निवीर'

मूळचे बीडच्या गांधनवाडी येथील रहिवासी असलेले सोमीनाथ आणि बबिता इथापे हे शंकरचे आई-वडील आहेत. लग्नानंतर गेली १९-२० वर्षे ते सलगपणे सोमेश्वर कारखान्यावर ऊसतोडणीसाठी येतात. आजही त्यांची गव्हाणीवरील ऊसाच्या पाल्याची झोपडी कारखान्यावर आहे आणि ते रोजंदारीवर ऊसतोडणीचे काम करतात. शंकरचे आजोबा खंडू इथापे आणि पणजोबा गैबी इथापे यांनीही याच कामात आयुष्य वेचले.

इथापे कुटुंबाच्या चौथ्या पिढीमध्ये शिक्षणाने क्रांती घडवली आहे. शंकरचा चुलत भाऊ कृषीराज इथापे हा नुकताच २०२२-२३ च्या पोलीस भरतीमध्ये यशस्वी झाला होता. कृषीराजच्या प्रेरणेने शंकरने दहावी उत्तीर्ण होताच गांधनवाडीतून थेट बारामती येथील एका खासगी पोलीस अकादमीत प्रवेश घेतला.