पुण्यात धावत्या ट्रेनमध्ये तरुणीसोबत नको ते कृत्य, 73 वर्षीय आरोपीला 10 वर्षांनी मिळाली 'ही' शिक्षा

ही घटना २०१६ मध्ये घडली होती. पीडित तरुणी आपल्या मैत्रिणीसह उच्च शिक्षणासाठी तळेगाव ते कासारवाडी या मार्गावर ट्रेनमध्ये प्रवास करत होती. या प्रवासादरम्यान आरोपी रमेश सदोरमल केसवानी (वय ७३, रा. पिंपरी) याने तरुणीचा विनयभंग केला होता. या घटनेमुळे हादरलेल्या तरुणीने तात्काळ पुणे लोहमार्ग पोलीस ठाण्यात तक्रार दाखल केली होती. पोलिसांनी आरोपीला अटक करून न्यायालयात दोषारोपपत्रही सादर केले होते.

ही केस न्यायालयात १० वर्षे चालली. इतका मोठा कालावधी लोटल्याने फिर्यादी आणि साक्षीदारांच्या आठवणी धूसर झाल्या होत्या. मात्र, लोहमार्ग पोलिसांनी हार मानली नाही. सरकारी वकील अश्विनी काळे यांनी सात महत्त्वाचे साक्षीदार तपासले आणि ठोस तांत्रिक पुरावे सादर केले. वरिष्ठ पोलीस अधिकाऱ्यांच्या मार्गदर्शनाखाली हवालदार अमरदीप साळुंके आणि पथकाने या केसचा सातत्याने पाठपुरावा केला.

दोन्ही बाजूंचा युक्तिवाद ऐकल्यानंतर, प्रथमवर्ग न्यायदंडाधिकारी एन. जे. चव्हाण यांनी आरोपी रमेश केसवानी याला दोषी ठरवले. त्याला सहा महिन्यांचा सश्रम कारावास आणि दोन हजार रुपये दंडाची शिक्षा सुनावण्यात आली.