Pimpri-Chinchwad : पिंपरी-चिंचवडमध्ये अचानक हवामान बदल; नागरिकांमध्ये आरोग्यविषयक तक्रारी वाढल्या, रुग्णसंख्येत झपाट्याने वाढ

शहरात सध्या मोठ्या प्रमाणावर बांधकामे, मेट्रोचे खोदकाम तसेच बीआरटी प्रकल्पाचे काम सुरु आहे. या सर्व कामांमुळे हवेत धूळ आणि सूक्ष्म कणांची मात्रा वाढली आहे. हे धूळ कण विशेषतहा श्वसनसंस्थेवर प्रतिकूल परिणाम करतात. अधून-मधून पडणारा पाऊस आणि धुलीच्या वाढत्या प्रमाणामुळे वातावरणात घसरलेली हवा नागरिकांच्या आरोग्यावर थेट परिणाम करत आहे. पहाटे गारवा आणि दुपारी कडक उन्हाळा यासारख्या बदलत्या हवामानामुळे शरीरावर ताण निर्माण होत आहे आणि त्यामुळे अनेकांना सर्दी, खोकला, अंगदुखी, डोकेदुखी यासारखे त्रास होत आहेत.

महापालिकेकडून शहरातील विविध रस्त्यांचे डागडुगे आणि सुधारणा करण्यात येत आहेत. रस्त्याचे खोदकाम, मेट्रो काम आणि इतर सार्वजनिक बांधकामे यामुळे धुळीचे प्रमाण वाढले आहे. हवेत प्रदूषण वाढल्यामुळे श्वसनासंबंधित रोग, अलर्जीज, दमा आणि फुफ्फुसाचे आजार अधिक दिसून येत आहेत. शहरातील नागरिकांना केवळ आजारी पडण्याचा धोका नाही तर दीर्घकालीन आरोग्य समस्या उद्भवण्याची शक्यता देखील वाढली आहे.