हिंदू नवं वर्षातील पहिली एकादशी कधी? कामदा एकादशी डेट, शुभ मुहूर्त आणि पूजा विधी, एका क्लिकवर

पंचांगानुसार, चैत्र शुक्ल एकादशी तिथी 28 मार्च 2026 रोजी सकाळी 08:45 वाजता सुरू होईल आणि 29 मार्च 2026 रोजी सकाळी 07:46 वाजता समाप्त होईल. हिंदू धर्मात 'उदया तिथी' महत्त्वाची मानली जाते. 29 मार्च रोजी सूर्योदयाच्या वेळी एकादशी तिथी असल्याने, कामदा एकादशीचे व्रत रविवार, 29 मार्च 2026 रोजी ठेवणे शास्त्रसंमत आणि शुभ ठरेल.

कामदा एकादशीच्या दिवशी, ब्रह्म मुहूर्त सकाळी 05:01 वाजता सुरू होतो आणि हा मुहूर्त 5 वाजून 48 मिनिटांपर्यंत असेल. अभिजित मुहूर्त दुपारी 12 वाजून 19 मिनिटांनी सुरू होत असून दुपारी 1 वाजून 8 मिनिटांपर्यंत असेल. हे दोन्हीही मुहूर्त कामदा एकादशीच्या पूजेकरिता सर्वोत्तम आहेत.

एकादशीच्या व्रताचा पूर्ण लाभ मिळवण्यासाठी ते योग्य वेळी सोडणे आवश्यक असते. द्वादशी तिथीला सूर्योदयांनंतरच व्रत सोडावे. सोमवार, 30 मार्च 2026 रोजी सकाळी 06:14 ते 07:09 या दरम्यान उपवास सोडावा. द्वादशी तिथी संपण्यापूर्वीच पारण करणे अनिवार्य आहे, अन्यथा व्रताचे पूर्ण पुण्य मिळत नाही, असे शास्त्र सांगते.

एकादशीच्या एक दिवस आधी म्हणजेच दशमीला सात्विक आहार घ्यावा आणि रात्री उशिरा जेवणे टाळावे. एकादशीच्या दिवशी सकाळी लवकर उठून पिवळे वस्त्र परिधान करावे. विष्णूच्या मूर्तीला पिवळी फुले, तुळशीचे पान आणि पिवळी फळे अर्पण करावीत. ज्यांना आर्थिक अडचणी आहेत, त्यांनी या दिवशी तुळशीसमोर शुद्ध गाईच्या तुपाचा दिवा लावून 11 वेळा प्रदक्षिणा घालावी. यामुळे भगवान विष्णू आणि माता लक्ष्मीची कृपा प्राप्त होते.