राम नवमीला बनतायत अनेक शुभ योग, 'या' वेळेत पूजा करणं ठरेल प्रभावी; जाणून घ्या अचूक डेट आणि शुभ मुहूर्त!

पंचांगानुसार, नवमी तिथीची सुरुवात 26 मार्च 2026 रोजी सकाळी 11:48 वाजता होईल आणि समाप्ती 27 मार्च 2026 रोजी सकाळी 10:06 वाजता होईल. मुख्य जन्मोत्सवाचा मुहूर्त 26 मार्च 2026, गुरुवारी असून पूजेची वेळ सकाळी 11:13 ते दुपारी 01:41 पर्यंत असेल. श्रीरामांच्या जन्माचा अचूक क्षण दुपारी 12:25 ते 12:27 च्या दरम्यान आहे. या काळात प्रभू रामांची पूजा आणि पाळणा हलवणे अत्यंत शुभ मानले जाते.

यंदा राम नवमीला 'रवि योग', 'सर्वार्थ सिद्धी योग', आणि 'शोभन योग' यांसारखे अत्यंत शक्तिशाली शुभ योग जुळून येत आहेत. ज्योतिषशास्त्रानुसार, या योगात केलेली पूजा आणि नवीन कार्याची सुरुवात अक्षय फळ देणारी ठरते. असे मानले जाते की, या दिवशी प्रभू रामांचा जन्म झाला तेव्हा पाच ग्रह उच्च राशीत होते. 2026 मधील हे शुभ योग तुमच्या करिअर आणि आर्थिक प्रगतीसाठी 'राजयोग' सिद्ध होऊ शकतात. या दिवशी 'राम रक्षा स्तोत्र' वाचल्याने सर्व संकटांपासून रक्षण होते.

राम नवमीच्या दिवशी सकाळी लवकर उठून स्नान करावे आणि स्वच्छ वस्त्र परिधान करावे. देवघरात राम दरबार किंवा रामाच्या मूर्तीची स्थापना करा. मूर्तीला गंगाजलाने स्नान घालून चंदन, अक्षता आणि फुले अर्पण करा. दुपारी 12:25 वाजता प्रभू रामांचा पाळणा हलवून "राम जन्माचा" सोहळा साजरा करावा. त्यांना सुंठवडा, खीर किंवा पंचामृताचा नैवेद्य दाखवावा. या दिवशी 'अखंड रामायण' किंवा 'रामचरितमानस'चे पठण करणे घरासाठी अत्यंत सुखद ठरते.

चैत्र नवरात्रीचा हा शेवटचा दिवस असल्याने अनेक घरांमध्ये या दिवशी 'कन्या पूजन' केले जाते. नऊ लहान मुलींना घरी बोलावून त्यांचे पाय धुवावे आणि त्यांना माता दुर्गेचे रूप मानून आदरपूर्वक भोजन द्यावे. भोजनात काळे चणे, पुरी आणि हलवा यांचा प्रसाद विशेषतः बनवला जातो. राम नवमीला गरजू लोकांना धान्य किंवा कपड्यांचे दान केल्याने कुंडलीतील ग्रहदोष शांत होतात आणि जीवनात सकारात्मक ऊर्जा निर्माण होते.