मोठी बातमी! चंद्रग्रहणामुळे सिद्धिविनायकाच्या दर्शन वेळेत मोठा बदल, मंदिर प्रशासनाने दिली महत्वाची अपडेट

फाल्गुन शुद्ध पौर्णिमेला म्हणजेच 3 मार्च रोजी हे खग्रास चंद्रग्रहण होणार आहे. हे ग्रहण भारतात दिसणार असल्याने त्याचे धार्मिक नियम आणि वेध पाळले जाणार आहेत. ग्रहणाची वेळ दुपारी 3 वाजून 20 मिनिटांनी सुरू होईल, तर समाप्ती सायंकाळी 6 वाजून 48 मिनिटांनी होईल. सूर्योदयापासून ते ग्रहण मोक्षापर्यंत वेध पाळले जातील.

चंद्रग्रहणाच्या काळात मंदिराच्या पवित्रतेचे आणि शास्त्राचे जतन करण्यासाठी मंदिर न्यासाने काही बदल केले आहेत. नेमके काय बदल केले आहेत आणि दर्शन कस घेता येणार जाणून घेऊ.

ग्रहणाचा स्पर्श दुपारी 3:20 ला होत असला, तरी तयारीसाठी दुपारी 3 ते सायंकाळी 7:30 या वेळेत गाभाऱ्यातील दर्शन पूर्णपणे बंद राहील. मात्र, या काळात मुखदर्शन किंवा बाहेरील दर्शन सुरू राहणार आहे, जेणेकरून भाविकांना लांबून बाप्पाचे दर्शन घेता येईल.

पहाटेच्या काकड आरती आणि पूजेच्या वेळेत कोणताही बदल करण्यात आलेला नाही. मात्र, दुपारी वेध काळ असल्याने दुपारी नैवेद्य दाखवला जाणार नाही. ग्रहण मोक्ष झाल्यानंतर शुद्धीकरण करून रात्री 9:30 वाजता महानेवेद्य आणि आरती पार पडणार आहे.

दुपारी 3 ते 7:30 या कालावधीत मंदिरात कोणत्याही प्रकारचा प्रसाद स्वीकारला जाणार नाही किंवा वाटला जाणार नाही. भाविकांनी याची नोंद घ्यावी असे आवाहन न्यासाने केले आहे.

ज्योतिषशास्त्रानुसार, ग्रहण काळात मंदिरे बंद ठेवण्याची किंवा देवाच्या मूर्तीला स्पर्श न करण्याची प्रथा आहे. याचे कारण असे मानले जाते की, ग्रहण काळात नकारात्मक ऊर्जेचा प्रभाव वाढतो. सिद्धिविनायक मंदिर न्यासाने या शास्त्राचा आधार घेत भक्तांच्या सुरक्षिततेसाठी आणि धार्मिक पावित्र्यासाठी हे बदल केले आहेत. सायंकाळी 7:30 वाजता धूपारती झाल्यानंतर मंदिर परिसर शुद्ध करून पुन्हा नेहमीप्रमाणे भक्तांसाठी गाभारा उघडला जाईल.