उन्ह तापलं, विठुरायासाठी खास म्हैसुरी चंदनाचा लेप, कशी असते चंदन-उटी पूजा?

दर वर्षी गुढी पाडवा ते मृग नक्षत्रपर्यंत दररोज दुपारी चार वाजता चंदन उटी पूजा केली जाते. चंदन हे अतिशय सुगंधी, शीतल असते. चंदनाच्या याच गुणामुळे दिवसभरातील हवेतील उष्णतेने शिणलेल्या विठुरायाला शीतलता वाटावी, यासाठी रोज दुपारी सुगंधी अशा चंदनाचा लेप सर्वांगाला लावला जातो. सध्या दररोज दीड किलो सुवासिक चंदन उगाळून त्याचा विठ्ठल आणि रुक्मिणीमातेच्या सर्वांगाला लेप लावला जातो. चंदन उटी पूजेमुळे नेहमीपेक्षा देवाचे रूप अधिक खुलून दिसते. हेच देवाचे सुंदर रूप डोळ्यांत साठवून ठेवण्यासाठी भाविक आतूर असतात.

चंदन उटी पूजेनंतर देवाला शिरा, पोहे, सुका मेवा कैरीच पन्हे आणि थंड लिंबू सरबत असा खास नैवद्य ही दाखवला जातो. चंदन उटी पूजेसाठी श्री विठ्ठल-रुक्मिणी मंदिर समितीने कर्नाटकामधील बंगळुरू, म्हैसूर येथून उच्च प्रतीचे सुंगधी 400 किलो चंदन खरेदी केले आहे. पूजेसाठी रोज दीड किलो चंदन उगाळून त्याचा लेप देवाला लावला जातो. चंदन उटी पूजेमुळे देवाचे रुप सुवर्णालंकारा पेक्षाही उठून दिसते. म्हणूनच अनेक भाविकांना चंदन उटी पूजा करून समाधान मिळते, अशी माहिती श्री विठ्ठल-रुक्मिणी मंदिर समितीचे व्यवस्थापक मनोज श्रोत्री यांनी दिली.

श्री विठ्ठल आणि रुक्मिणी मातेची चंदन उटी पूजेचे 2 महिन्यांचे बुकिंग फुल्ल झाले आहे. विठ्ठलाच्या चंदन उटी पूजेसाठी 21 हजार रुपये, तर रुक्मिणी मातेच्या चंदन उटी पूजेसाठी 9 हजार रुपये देणगी शुल्क आकारले जाते.