IPL 2026 : मॅच कॅन्सल, पण पॉईंट्स टेबल उलटं फिरलं, चौथ्या क्रमांकाची पंजाब टॉपला, मुंबई कितव्या नंबरवर?

आयपीएलच्या या मोसमात केकेआरचा पहिल्या दोन्ही सामन्यांमध्ये पराभव झाला होता, त्यामुळे त्यांचे शून्य पॉईंट होते. आता सामना रद्द झाल्यामुळे केकेआरला अखेर या मोसमातला त्यांचा पहिला पॉईंट मिळाला आहे. दुसरीकडे पंजाबने मात्र सुरूवातीलाच केकेआरला अडचणीत आणलं होतं, त्यामुळे सामना जिंकून 2 पॉईंट्स खिशात टाकण्याची संधी हातातून गेल्याचं पंजाबला वाटेल. हा सामना जिंकून पंजाबचे 3 सामन्यांमध्ये 3 विजयांसह 6 पॉईंट्स झाले असते, पण आता पंजाबकडे 5 पॉईंट्स आहेत.

आयपीएल पॉईंट्स टेबलमध्ये 3 सामन्यांमध्ये 5 पॉईंट्ससह पंजाब पहिल्या क्रमांकावर आहे. पंजाबचा नेट रनरेट हा +0.637 एवढा आहे. या सामन्याच्या आधी पंजाब चौथ्या क्रमांकावर होती, पण फक्त एक पॉईंट मिळाल्यानंतरही श्रेयस अय्यरची टीम चौथ्या क्रमांकावरून थेट पहिल्या क्रमांकावर आली आहे.

पंजाब पहिल्या क्रमांकावर गेल्यामुळे आरसीबी दुसऱ्या राजस्थान तिसऱ्या आणि दिल्ली चौथ्या क्रमांकावर आहे. या तिन्ही टीमनी त्यांचे 2 पैकी 2 सामने जिंकले आहेत. प्रत्येकी 4 पॉईंट्स असूनही नेट रनरेटमुळे या टीम वेगवेगळ्या क्रमांकावर आहेत.

3 सामन्यांमध्ये एक विजय आणि दोन पराभवांसह सनरायजर्स हैदराबाद पाचव्या तर 2 मॅचमध्ये एक विजय आणि एका पराभवासह मुंबई इंडियन्स सहाव्या क्रमांकावर आहे. सनरायजर्स हैदराबादचा नेट रनरेट हा +0.275 तर मुंबईचा नेट रनरेट हा मायनस -0.206 आहे, त्यामुळे मुंबई हैदराबादच्या मागे आहे. मुंबईप्रमाणेच लखनऊनेही 2 पैकी 1 सामना जिंकला असून एक सामना गमावला आहे, पण लखनऊचा नेट रनरेट मायनस 0.542 असल्यामुळे ते सातव्या क्रमांकावर आहेत.

3 सामन्यांमध्ये 2 पराभव आणि एक सामना रद्द झाल्यामुळे केकेआर एका पॉईंटसह आठव्या क्रमांकावर आहे. तर गुजरात आणि चेन्नई यांचा 2 पैकी 2 सामन्यात पराभव झाला आहे, त्यामुळे गुजरात नवव्या आणि चेन्नई दहाव्या क्रमांकावर आहे.