Mayday...Mayday...Mayday विमानाचं भररस्त्यात क्रॅश लॅण्डिंग, अनेक गाड्यांना धडक, काळजाचा ठोका चुकवणारा VIDEO

हे 'सिंगल इंजिन' विमान गेन्सविलेच्या विमानतळावरून निघालं होतं, हे एक ट्रेनिंग देण्यासाठी वापरलं जाणारं विमान असल्याचं सांगण्यात आलं आहे. मात्र काही वेळातच इंजिनमध्ये बिघाड झाला. विमानाची उंची आणि शक्ती कमी होत असल्याचे पाहून वैमानिकाने 'मेडे, मेडे मेडे' कॉल दिला. विमानतळापर्यंत पोहोचणे अशक्य असल्याचं लक्षात येताच वैमानिकाने भर ररस्त्यात ब्राउन्स ब्रिज रोडवर विमान उतरवण्याचा धाडसी निर्णय घेतला.

अपघातापूर्वी वैमानिकाला आपण वाचू की नाही, याची खात्री नव्हती. त्याने अत्यंत भावूक होत कंट्रोल रूमला सांगितले, "आम्ही पोहोचू शकणार नाही. प्लीज, माझ्या पत्नीला सांगा की माझं तिच्यावर खूप प्रेम आहे... आणि माझ्या आई-वडिलांनाही सांगा, मी त्यांच्यावर खूप प्रेम करतो." वैमानिकाचा हा निरोप सध्या सोशल मीडियावर व्हायरल झाला आहे.

रस्त्यावर वाहनांची मोठी वर्दळ असतानाच विमानाने क्रॅश लॅण्डिंग केलं. लँडिंग करताना विमानाचा उजवा पंख एका वाहनाला धडकल्याने मोठा अपघात झाला. विमानाची इंधन टाकी एका एसयूव्हीमध्ये घुसली. सुदैवाने, या भीषण धडकेत कोणतीही जीवितहानी झाली नाही मात्र काही नागरिक जखमी झाले.

या घटनेचा व्हिडिओ सध्या जगभरात व्हायरल होत आहे. ज्या प्रकारे वैमानिकाने व्यस्त रस्त्यावर विमान उतरवले आणि मृत्यूला समोर पाहूनही आपल्या कुटुंबाची आठवण काढली, ते पाहून नेटकरी वैमानिकाच्या धाडसाचे कौतुक करत आहेत. फेडरल एविएशन एडमिनिस्ट्रेशन आणि नॅशनल ट्रान्सपोर्टेशन सेफ्टी बोर्ड या प्रकरणाचा अधिक तपास करत आहेत.