गोकुळ दूध संघटनेकडून गायीच्या दुधात 3 रुपयांची कपात, सर्वसामान्य शेतकरी म्हणाले, हा निर्णय...

कोल्हापूर : विधानसभा निवडणूक संपताच गोकुळ दूध संघटनेने एक मोठा निर्णय घेतलेला आहे. या निर्णयामुळे शेतकऱ्यांना धक्का बसला आहे. गोकुळ दूध संघटनेने गायीच्या खरेदी दरात 3 रुपयांची कपात केली आहे. यापूर्वी गोकुळ गाईचे दूध 33 रुपयांनी खरेदी करत होते. मात्र, आता या निर्णयामुळे गोकुळ 30 रुपयांनी गाईचे दूध खरेदी करणार आहे.

एकंदरीतच या दरात कपात केल्यामुळे शेतकऱ्यांना मोठा फटका बसणार असल्याचे चित्र पाहायला मिळत आहे. याबद्दल दूध उत्पादक शेतकऱ्यांनी नाराजी व्यक्त केली आहे. यावेळी दूध उत्पादक शेतकरी रुपेश पाटील यांच्याशी लोकल18 ने संवाद साधला.

राज्य शासनाने ऑक्टोबर 2024 पासून गाय दूध खरेदीचा 3.5 फॅट व 8.5 एस.एन.एफ.करिता किमान प्रतिलिटर 28 रुपये निश्चित केला आहे. महाराष्ट्रात इतर संघ 27 ते 28 रुपये दराने गाय दूध खरेदी करत आहेत. कोल्हापूर जिल्ह्यातील दूध संघ 33 रुपये दर देत आहेत. तो 6 रुपये जास्त आहे. या जास्तीच्या दरामुळे लोणी, दूध भुकटी याची उत्पादन किंमत जास्त येत असल्याने बाजारामध्ये त्याची स्पर्धात्मक दराने विक्री करू शकत नाही.