HR88B8888 भारताची सर्वात महागडी नंबर प्लेट, किंमत इतकी की आकडा ऐकून बसेल धक्का

साधारणपणे, आपल्या देशातील नागरिक 20 ते 30 लाख रुपयांपर्यंतच्या कारमध्ये प्रवास करतात. काही श्रीमंत मंडळी 50 लाख ते एक कोटी रुपयांपर्यंतच्या आलिशान गाड्या घेतात. पण, तुम्हाला माहित आहे का की, जगामध्ये काही लोक केवळ गाडीसाठीच नव्हे, तर तिच्या नंबर प्लेटसाठीही कोट्यवधी रुपये खर्च करतात? होय, हे खरं आहे. हरियाणातील एका व्यक्तीने तर नंबर प्लेटसाठी जी रक्कम मोजली आहे, ती ऐकून तुम्हाला नक्कीच धक्का बसेल.

advertisement

भारतात आतापर्यंतची ही सर्वात महागडी नंबर प्लेट ठरली आहे आणि केवळ भारतातच नाही, तर जगभरातही अशा अनेक नंबर प्लेट्स आहेत ज्यांच्या किमती ऐकून कोणीही थक्क होईल. चला तर, आज आपण भारतातील सर्वात महागडी नंबर प्लेट आणि जगातील सर्वात महागडी नंबर प्लेट कोणती आहे, ते सविस्तरपणे जाणून घेऊया.

हरियाणातील 'ती' खास नंबर प्लेट: 1.17 कोटी रुपये

हरियाणातील एका व्यक्तीने आपल्या कारच्या नंबर प्लेटसाठी तब्बल 1.17 कोटी रुपये मोजले आहेत. ही नंबर प्लेट आहे HR88B8888. या नंबर प्लेटची खासियत अशी आहे की, यात लागोपाठ '8' हा अंक येतो आणि मधला 'B' अक्षरही '8' सारखाच दिसतो. यामुळे हा नंबर अतिशय खास मानला जातो.

या नंबर प्लेटसाठीची लिलाव प्रक्रिया fancy.parivahan.gov.in या सरकारी पोर्टलवर पार पडली. 50,000 रुपयांच्या मूळ किमतीपासून सुरू झालेल्या या लिलावात 45 लोकांनी सहभाग घेतला. बोली वाढत गेली आणि शेवटी 1.17 कोटी रुपयांवर स्थिरावली.

HR हा हरियाणा राज्याचा कोड आहे. 88 हा जिल्ह्याचा कोड असून, B हे सीरिज दर्शवते आणि 8888 हा युनिक नंबर आहे. हा संपूर्ण पॅटर्न पाहताना तो लागोपाठ येणाऱ्या '8' अंकांसारखा दिसतो, ज्यामुळे त्याची मागणी खूप जास्त होती. लिलावाच्या नियमांनुसार, खरेदीदाराचे नाव जाहीर केले जात नाही. लिलाव शुक्रवार ते सोमवार या कालावधीत चालतो आणि निकाल बुधवारी संध्याकाळी 5 वाजता जाहीर केला जातो.

हरियाणातील या नवीन रेकॉर्डपूर्वी, केरळमधील एका आलिशान कारसाठी KL 07 DG 0007 हा नंबर 45,99 लाख रुपयांना विकत घेण्यात आला होता. केरळमधील एका टेक कंपनीच्या सीईओने हा नंबर घेतला होता.

आता जगातील सर्वात महागड्या नंबर प्लेटबद्दल बोलायचे झाले तर, ही किंमत ऐकून तुमचे डोळे विस्फारतील! जगातील P 7 या नंबर प्लेटची किंमत आहे तब्बल 123 कोटी रुपये आहे.

दुबईमध्ये पार पडलेल्या एका लिलावात, ही बोली 55 मिलियन दिरहॅमपर्यंत पोहोचली, जी भारतीय रुपयांमध्ये जवळपास 123 कोटी रुपये होते. हा आतापर्यंतचा जगातील सर्वात महागडा नंबर प्लेट विक्रीचा विक्रम आहे. यापूर्वी, अबू धाबीमध्ये 'नंबर 1' असलेली नंबर प्लेट 52.2 मिलियन दिरहॅममध्ये (सुमारे 118 कोटी रुपये) विकली गेली होती.

fancy.parivahan.gov.in या वेबसाइटवर दर आठवड्याला फॅन्सी नंबर प्लेट्ससाठी लिलाव आयोजित केला जातो. त्यामुळे, जर तुम्हालाही तुमच्या आवडीचा व्हीआयपी नंबर हवा असेल, तर तुम्ही ऑनलाइन बोली लावून तो मिळवू शकता. गाडीच्या नंबर प्लेटसाठी इतके कोट्यवधी रुपये खर्च करणारे हे शौकिन लोक खरोखरच अद्भूत आहेत.