चिखमगळूर पोलिस अधीक्षक विक्रम अमाथे यांनी दिलेल्या माहितीनुसार, 20 जून रोजी शहरात मोठ्या चोरीची घटना घडली होती. अज्ञात चोरट्यांनी एका घरातून 495 ग्रॅम सोनं आणि 1 किलो चांदी लंपास केली होती. या प्रकरणाचा तपास करण्यासाठी चिखमगळूर टाउन पोलिस स्टेशनचे निरीक्षक अभय यांच्या नेतृत्वाखाली विशेष पथकाची स्थापना करण्यात आली.
महाराष्ट्रातून अटक
advertisement
काही दिवसांच्या सततच्या तपासानंतर पोलिसांनी या टोळीतील दोन संशयितांचा ठावठिकाणा महाराष्ट्रात शोधून काढला. पोलिसांनी पप्पू पवार (40) आणि मंगेश अंकुश (23) या दोघांना जालना जिल्ह्यातून अटक केली. त्यांच्या ताब्यातून चोरीचा मालही जप्त करण्यात आला. चौकशीत त्यांनी चिखमगळूर व्यतिरिक्त बल्लारी, गदग आणि चित्रदुर्ग जिल्ह्यांमध्येही चोरी केल्याची कबुली दिली आहे.
‘चड्डी गँग’चा कुख्यात इतिहास
‘चड्डी गँग’ ही राज्यभर पसरलेली एक कुख्यात चोरट्यांची टोळी आहे. या टोळीचे सदस्य चोरी करताना विशिष्ट कपड्यांमुळे सहज ओळखले जातात. अनेक ठिकाणी घरफोड्या आणि दागिन्यांच्या चोरीच्या प्रकरणांमध्ये त्यांचं नाव समोर आलं आहे.
पुढील तपास सुरू
पोलिस अधीक्षक अमाथे यांनी सांगितलं की, "सध्या अटक केलेले दोन्ही आरोपी न्यायालयीन कोठडीत आहेत. या टोळीत एकूण आणखी सहा सदस्य असल्याची माहिती मिळाली आहे आणि त्यांचा शोध सुरू आहे." चिखमगळूर पोलिसांनी या कारवाईमुळे चोरीच्या घटनांवर आळा घालण्यात यश मिळवलं आहे.